Keriç yalısında ğayıp olğan ösmürni 130 qurtarıcı ve 58 göñülli qıdıra. Bunı Rusiye FVN-niñ Qırım idaresi bildirmekte.
"Qıdıruv işleri devam etmekte. Operatsiayda Qırım FVN-niñ baş idaresiniñ 32 adamı, 9 tehnikası; Qırım FVN-niñ 98 adamı, 11 tehnikası ve 58 göñülli iştirak ete", – müessise beyanatından yaza "Krıminfrom".
Sentâbr 11-inde saba Keriç boğazında Fener burnunda, deñizge ketken balanıñ qıdıruvı yapılğanı, bildirilgen edi. Keççe Tahqiqat Komiteti, ösmürniñ ğayıp olğanını teşkerip başladı.
Tünevin Qırım qurtarıcıları, yarımadanıñ sakin ve musafirlerine, Qara ve Azaq deñizlerinde yuvunmaqtan vazgeçmege tevsiye etti.
Yaltada, küçlü furtunağa baqmadan, turistler deñizde yuvuna.
Furtunalar, Qırımnıñ şimaliy yalısını bazar künü, sentâbr 8-inde qapladı. O vaqıt dalğalar 5 ballğa bara edi. Keçken raatlıq künlerde qurtarıcılar Qırımda furtuna sebebinden bir kün içinde altı insan elâk oldı, dep bildirdi. Sentâbr 9-ında Qırımdaki Rusiye Fevqulâde vaziyetler nazirliginiñ idaresi, deñizde daa eki insan elâk olğanını bildirdi. Qurtarıcılarnıñ malümatına köre, furtunanıñ birinci kününde deñizden eki cesedni çıqarıp oldılar, sentâbrniñ 10-unda Qırım FVN-ne atıf etken yerli matbuat, Sudaqta daa bir cesedni suvdan çıqardılar, dep haber etti.
