Azatlıq Radiosınıñ saytı blok etilgen territoriyalar içün bağlantı
Qırımda havflı ava şaraiti aqqında ihtarnı sentâbr 16-sına qadar uzattılar. Bunı sentâbr 13-ünde Rusiye FVN-niñ Qırım idaresiniñ saytında haber ettiler.
"Sentâbr 13 – 16-sında Qırımda fevqulâde yanğın telükesi olacaq. Sentâbr 13-ünde Qırımda şimal-şarqiy yelniñ küçleşüvi tahmin etile", – denile beyanatta.
Hususan, cuma künü, küçlü yel sebebinden qurtarıcılar, "ev damlarınıñ, yengil binalarnıñ, reklama inşaatlarınıñ bozuluvınen; bütün naqliyat areketiniñ zorlaşuvınen; terek yıqılması, elektrik hatlarnıñ üzülmesinen" bağlı qazalar ola bilecegini tahmin ete.
Bundan ğayrı, qurtarıcılar, Keriç parom keçitiniñ işi qıyınlaşacağını tahmin ete.
Daa evel Qırım qurtarıcıları, yarımadanıñ sakin ve musafirlerine, Qara ve Azaq deñizlerinde yuvunmaqtan vazgeçmege tevsiye etti. Keçken raatlıq künlerden berli Qırımda qaynağan furtuna içün, qurtarıcılar, er kün adamlar suvda boğulıp batqanı aqqında haber ete.
Tınmağan furtuna: Yaltada beş künden berli deñiz qaynay (süret toplamı)
