Qırımda sentâbr 11-inde öyle de furtunalı ava olacaq, yel 25 m/s qadar küçleşecek.
Çarşenbe künü, eñ çoq batqan adam olğan Yalta yalısında dalğalar 1,5 metrge bara, yerli meteo resurslar Kezlev (Yevpatoriya) yalısında 2 metrge qadar dalğalarnı tahmin ete. Aynı böyle tahminler Sudaq içün de yapıla.
Çarşenbe künü, sentâbr 11-inde qurtarıcılarğa atıf etken yerli matbuat, deñizde daa bir adam batqanını haber etti. Onıñ cesedini Kefe (Feodosiya) yanında suvdan çıqardılar.
Çarşenbe künü saba Keriç boğazında Fener burnunda, deñizge ketken balanıñ qıdıruvı yapıla edi.
Tünevin Qırım qurtarıcıları, yarımadanıñ sakin ve musafirlerine, Qara ve Azaq deñizlerinde yuvunmaqtan vazgeçmege tevsiye etti.
Aluştada furtuna sebebinden bütün plâjlar qapatıldı.
Yaltada, küçlü furtunağa baqmadan, turistler deñizde yuvuna.
Furtunalar, Qırımnıñ şimaliy yalısını bazar künü, sentâbr 8-inde qapladı. O vaqıt dalğalar 5 ballğa bara edi. Keçken raatlıq künlerde qurtarıcılar Qırımda furtuna sebebinden bir kün içinde altı insan elâk oldı, dep bildirdi. Sentâbr 9-ında Qırımdaki Rusiye Fevqulâde vaziyetler nazirliginiñ idaresi, deñizde daa eki insan elâk olğanını bildirdi. Qurtarıcılarnıñ malümatına köre, furtunanıñ birinci kününde deñizden eki cesedni çıqarıp oldılar, sentâbrniñ 10-unda Qırım FVN-ne atıf etken yerli matbuat, Sudaqta daa bir cesedni suvdan çıqardılar, dep haber etti.
