Mayısnıñ 11-i sabasınace Qırım observatorlarına COVID-19 sebebinden 655 adam qoyuldı.
Bunı Rusiye nezaretindeki Rusiye Sağlıq Nazirligi bildire.
"Tibbiy baqıluv astında 1742 adam buluna, olardan 908-i mesken yerlerinde közetile, 179-ı hastahanelerde", - denile beyanatta.
Yañı koronavirus yuqunçınıñ tarqaluvına qarşı operativ ştab toplaşuvında Qırım ve Aqyardaki Rospotrebnadzor idaresiniñ yolbaşçısı Natalya Penkovskaya haber etkenine köre, tünevin Qırımğa kelgenlerniñ 13-ü observatorlarğa qoyuldı.
Soñki 24 saat içinde Qırımda doquz yañı COVID-19 adisesi qayd etildi.
Al-azırda Qırımda 177 koronavirus hastası bar. 22-si çetelden keldi, 18-i – Rusiyeden. 23 insan Rusiyeden kelgenlernen alâqada edi, 114-ü laboratoriyada tasdıqlanğan hastalarnen alâqada oldı. 44 insan tüzeldi. Bir koronavirus hastası vefat etti. Aqyarda 110 COVID-19 hastası bar, eki kişi vefat etti.
Qırımda mayısnıñ 12-nden itibaren koronavirus yuqunçına oğrav telükesi sebebinden mecburiy maska rejimi kirsetile.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.