Ukraina Tış işler naziri «Qırım platforması» sammitiniñ iştirakçileri aqqında tarif etti

Ukraina Tış işler naziri Dmıtro Kuleba

Ukraina Tış işler naziri Dmıtro Kuleba 28 memleket ve halqara teşkilât avgustnıñ 23-nde «Qırım platforması» sammitinde iştirak etmege razı oldı, dep bildirdi.

«28 memleket ve halqara teşkilât «Qırım platforması» sammitinde iştirak etecegini tasdıqladı. Bu Ukraina tarihında emalsiz halqara tedbir olacaq. O qadar memleket Ukrainada daa toplanmağan edi. Bu netice bizge Qırımnı işğalden qurtaruv koalitsiyasını qurıp olğanımıznı aytmağa imkân bere», – dep ayttı o, iyülniñ 28-nde brifing vaqtında.

Kuleba, «Rusiye er bir memleketni «Qırım platformasında» iştirak etmesinden vazgeçtirmege tırışıp, buña muntazam sürette qarşılıq köstere», dep bildire.

«Qırım beyannamesi aman-aman tasdıqlandı ve bu sammitniñ netice vesiqası olacaq, Ukraina içün printsipial müim meseleler qayd etilecek. «Qırım platforması» muvafaqiyetli işiniñ finiş yolunda bulunamız», – dep qoştı Kuleba.

SEE ALSO:

Emine Ceppar: «Qırım platforması» istilâcınen tango oynamaqnıñ cezası olğanını dünyağa kösterecek»

Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.

Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.

Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.

Kreml, Rusiye 2014 senesi işğal etken Qırımnıñ topraq mensüpligi meselesi muzakere etilmeycek, dep bildirgen edi. 2014 senesi AB ve ABD Qırım işğali ve Rusiyeden destek alğan «DNR» ve «LNR» tarafından bir qısmı işğal etilgen Donbastaki vaziyet sebebinden Rusiyege qarşı sanktsiyalar kirsetti.