Qadimiy örnek sırları: qırımlı qırımtatar çölmekçilikniñ ananelerini saqlay (video)

Ağır vaqıtlar ve hastalıq, qırımlı Edem Ganiyevni islâm ögrenmesine ve camide yaşamaqqa sebep oldı. Mında o çölmekçiliknen oğraşıp başladı: bu ünerni bir kere sınap, o başqa toqtanıp olamadı. Başından o, öz eserleri içün balçıqnı Bağçasarayda ala edi. Birinci furunnı o, iç bir shemasız yaptı, onıñ yekâne yardımcısı ise kitaptan bilgiler ve öz hataları edi. Bugün Edem Ganiyev – Qırımda belli ve tecribeli olğan çölmekçidir. O, qadimiy qırımtatar örneklerinen savut yapa, ve şu örneklerniñ er birisiniñ ayrı manası bar. Bir tepside baht, zenginlik, sevgi, dua, bereket timsallerini körmek mümkün. Onıñ eserleri tek Qırım evlerini degil de, dünyanıñ çeşit-türlü köşelerinde olğan evlerni yaraştıra. Öz tecribesini, bilgilerini ve üner sırlarını Edem öz şegirtlerine ögrete. Olar da endi Qırımda belli olğan çölmekçiler oldı.