Mustafa Cemilevniñ apayını taşığan aydavcı Ahtem Mustafayev, Bağçasaraydaki tintüv ve yaqalanuvdan soñ Rusiye telükesizlik hadimleri tarafından Aqmescitte yiberildi. Bunı iyün 29-da Qırım.Aqiqat Radiosı efirinde Qırımtatar Milliy Qurultayınıñ MİK başlığı Zair Smedlâyev ikâye etti.
Faaliyetçi: «Ahtemni aqşamğa qadar başında çuval ile tuttılar – o, atta, bütün bu vaqıt içinde qayda olğanını bilmey edi. FSB başta onıñ olarda olğanını ayta edi, soñundan ise olarda olmağanını ayttı. Nasıldır añlaşılmağan oyunlar başlandı. Ahır soñu, ne de olsa, Aqmescitte yiberdiler», – dep qayd etti.
Smedlâyev, Rusiye telükesizlik hadimleri, şay etip, qırımtatar toplulığınıñ diqqatını Aqmescit civarında bulunğan Davıdovka köyündeki eki kişiniñ öldürilmesinden çetke çekmek istediler, dep zan ete.
Smedlâyev: «Adet üzre, böyle ciddiy facialar olğanda, anda bir de-bir havflı al olsa, telükesizlik hadimleri diqqatnı çetke çekmek içün başqa türlü manevrlerni qullana. Bu endi çoq kere oldı – insanlar cenazege mümkün olğanı qadar çoq kelmesin, dep. Bağçasarayda em soylar, em tanışlar, em de qomşular Ahtem Mustafayevniñ vaziyetini közete ediler», – dep hulâsa çıqardı.
İyün 28-de qırımtatar faaliyetçisi Zair Smedlâyev, Bağçasarayda qırımtatar halqınıñ lideri Mustafa Cemilev niñ apayı Safinarnı taşığan aydavcı Ahtem Mustafayevniñ evi tintilgenini bildirdi. Daa soñra Ahtemniñ telükesizlik hadimleri tarafından belli olmağan tarafqa alıp ketilgeni bildirildi.
İyün 27-de Qırımda Aqmescit rayonınıñ Davıdovka köyündeki evinde 33 yaşlı qırımtatar qadını öldürildi. Onıñ kiçik oğlunı pıçaq yaraları ile hastahanege alıp kettiler, lâkin anda oğlan can berdi.
İçtimaiy ağlardan alınğan malümatqa köre, yaqalanğan şahıs Davıdovkanıñ merkezini aylanıp yüre edi. Qurbanlarınıñ evi yanında qatil maşinanıñ camlarını qırdı, qomşu eviniñ qapı sapında ise qanlı izler qaldırdı. Çoqqa barmayıp, qatil yaqalandı. Onıñ, 33 yaşlı yerli sakin olğanı belli oldı.