Link açıqlığı

Saatnıñ esas haberi

Aqmescit rayonında qadın ve onıñ kiçik yaşlı oğlu vahşiyce öldürildi – Tahqiqat komiteti


İyün 27 aqşamı Aqmescit rayonında öldürilüv alâmetleri ile 33 yaşlı rayon sakinesiniñ cesedi ve pıçaq yaraları ile onıñ kiçik oğlu tapıldılar. Daa soñra o, hastahanede can berdi. Bunı Rusiye Tahqiqat komitetiniñ Qırım boyunca baş tahqiqat idaresi yanındaki tahqiqat bölüginiñ matbuat hizmeti bildire.

Bildirüvde: «Oğlan hastahanege alıp barıldı ve anda, tibbiy yardımnıñ kösterilgenine baqmadan, bir müddet soñra can berdi», – denile.

Müessiseniñ malümatına köre, qatil tapıldı. Eñ qısqa vaqıt içinde 23 yaşlı yerli sakin yaqalandı. Yaqın vaqıtta oña qabaatlav ilân etilecek ve, ondan ğayrı, sıñırlav tedbiri saylanacaq. Şimdi cinaiy iş tahqiq etile, cinayetniñ tafsilâtları ögrenile.

Müessisede bu vaqia boyunca Rusiye Cinayet kodeksiniñ 105-nci maddesiniñ 2-nci qısmındaki «a» ve «в» punktları (eki ve daa ziyade şahısnı öldürüv) boyunca cinaiy iş açıldı. Bu madde, bir yıldan eki yılğa qadar müddetke azatlıqnıñ sıñırlanması ile eñ çoq 8-den 20 yılğace azatlıqtan marum etüv şeklinde cezalavnı tayin ete.

2018 senesiniñ başından ilhaq etilgen Qırımda cinayetler ve şu cümleden ağır cinayetler sayısınıñ artması közetile. Bu malümatnı, Rusiye TİNiniñ Qırım boyunca idaresi tarafından berilgen malümatqa atıfta bulunıp, Krımstat bildire.

Daa evel, ilhaq etilgen Qırımda bir Ukraina vatandaşı olğan erkekniñ, ömür arqadaşını öldürgeninde qabaatlanğanı bildirildi.

Ondan evel, Kremlniñ kontroli altında olğan Qırım prokuraturası Aqmescitte inkassatorlarğa yapılğan aydutça ücüm boyunca cinayet davasını açtı, dep bildirildi.

XS
SM
MD
LG