Rusiye prezidenti Vladimir Putinniñ matbuat kâtibi Dmitriy Peskov, Rusiye devleti başlığınıñ mart 14-te Aqyarda miting-kontsertte çıqışı «saylavnen alâqalı degil», dep iddia ete.
Rusiyedeki «İnterfaks» haber agentligi: «Aqyarda o (Putin – AQ) şeer cemaatçılığınıñ vekilleri ile körüşecek, muim meseleler aqqında suhbetleşecek ve ondan ğayrı referendumnıñ yıllığı munasebetinen ötkerilgen mitngde iştirak etecek… Qayd etem ki, bu, elektoral tedbir degl, bu, prezident saylavına alâqası olmağan miting», – dep, Peskovnıñ sözlerini naqil ete.
Rusiye prezidenti Vladimir Putin mart 14-te «iş ziyareti» çerçivesinde ilhaq etilgen Qırımğa kelmek istey. Kreml matbuat hizmetiniñ malümatına köre, Putin qurulmaq üzre olğan Keriç köprü ve «Simferopol» ava limanınıñ yañı aerovokzal kompleksini körecek ve Aqyarnı ziyaret etecek.
Putin keçken sefer Qırımnı 2017 senesiniñ noyabrinde ziyaret etti. O vaqıt o, Yaltadaki Livadiya sarayınıñ territoriyasında Rusiye çarı III Aleksandr eykeliniñ açılışında iştirak etti.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.