Yaltada mart 9-da ukrain şairi Taras Şevçenkonıñ doğğan kününiñ yıllığı munasebeti ile Qırım sakinleri eykeli yanına çeçekler ketirdiler. Bunı Qırım.Aqiqat muhbiri bildire.
Eykel Taras Şevçenko adına skverde tura. Ukrainanıñ devlet bayrağı tüsündeki taze çeçek desteleri eykelniñ temel taşına qoyuldı, bir qaç çeçekni onıñ qoluna tutturdılar, dep bildire muhbir.
Yaltada Taras Şevçenko eykeli. 2018 senesi mart 9 künü
Onıñ malümatına köre, Yaltada Ukrainanıñ aman-aman bütün emiyetli baylarmlarına Taras Şevçenkonıñ eykeline çeçekler ketireler. Şeer sakinleri eykelge sayğı köstere – Şevçenko skveri, o yerde muntazam surette öz mitinglerini toplağan içkicilerniñ sevgen yeri olğanına baqmadan, vandalizm ya da eykelni aramlama adiseleri olmadı, dep qayd ete muhbir.
Daa evel, Qırımda 2018 senesi mart 9-da Aqmescitte, Keriçte ve Aqyarda Taras Şevçenko eykelleri yanına çeçekler qoyulğanı aqqında bildirilgen edi.
2016 senesinde Şevçenkonıñ doğğan künü yıllığını Keriç, Aqmescit, Aqyar ve diger şeerlerde qayd ettiler. Kobzarnıñ eykelleri yanında şiirler oqudı ve ukrain türkülerini yırladılar.
В 2015 senesinde Aqmescitte Şevçenko eykeline çeçekler qoyğanda Ukraina tarafdarı olğan faaliyetçilerni polis yaqalay edi.
Mart 9-da Kobzar olaraq da belli olğan Ukraina yazıcısı ve ressamı Taras Şevçenkonıñ doğğan künü qayd etile. O, 1814 senesinde doğdı. Onıñ istidatı rus ve ukrain tilinde şiirler ve nesir yazğanında, bediiy ve grafik icadında, cemiyet faaliyetinde ve beñzer faaliyetlerde öz ifadesini taptı. Ukrainler içün Şevcenko, özlerini bir millet olaraq tanuv elementlerinden biridir.