Mart 9, cuma künü, Ukrainanıñ belli yazıcısı ve ressamı Taras Şevçenkonıñ doğğan kününde Qırımdaki Ukraina medeniyet merkeziniñ faaliyetçileri onıñ Aqmescitteki eykeline çeçekler qoydılar. Bunı Qırım.Aqiqat muhbiri bildire.
Çiçeklerni qoyğan soñ faaliyetçiler, Şevçenkonıñ doğğan künü munasebeti ile çıraqlar qoymaq içün Kyiv patriarhatına ait Ukraina ortodoks kilsesiniñ havariylerge musaviy aziz Olga ve Vladimir ibadethanesine yol aldılar.
Faaliyetçilerniñ aytqanına köre, kütleviy tedbirlerniñ ötkerilmesi planlaştırılmay, çünki Kremlniñ kontroli altında olğan Qırım ükümeti olarğa cemiyet içinde faaliyet köstermekni yasaqlay.
2017 senesinde Şevçenkonıñ doğğan künü yıllığını Keriç, Aqmescit, Aqyar ve diger şeerlerde qayd ettiler. Kobzarnıñ eykelleri yanında şiirler oqudı ve ukrain türkülerini yırladılar.
В 2015 senesinde Aqmescitte Şevçenko eykeline çeçekler qoyğanda Ukraina tarafdarı olğan faaliyetçilerni polis yaqalay edi.
Mart 9-da Kobzar olaraq da belli olğan Ukraina yazıcısı ve ressamı Taras Şevçenkonıñ doğğan künü qayd etile. O, 1814 senesinde doğdı. Onıñ istidatı rus ve ukrain tilinde şiirler ve nesir yazğanında, bediiy ve grafik icadında, cemiyet faaliyetinde ve beñzer faaliyetlerde öz ifadesini taptı. Ukrainler içün Şevcenko, özlerini bir millet olaraq tanuv elementlerinden biridir.
