Mart 9, cuma künü, Ukrainanıñ belli yazıcısı ve ressamı Taras Şevçenkonıñ doğğan kününde Aqyar sakinleri onıñ Oktâbrskoy revolütsiyi prospektinde bulunğan eykeline çeçekler qoydılar. Bunı Qırım.Aqiqat muhbiri bildire.
Onıñ malümatına köre, vatandaşlar çeçekler ile eykelge sabanıñ saar vaqtından başlap kelip başladılar. Şeerdeki «Aqyar ukrain milliy-medeniy cemiyeti» cemiyet teşkilâtınıñ (UNKOS) azaları Taras Şevçenko eykeline çeçeklerni individual şekilde qoydılar.
Daa soñra Qırım.Aqiqat saytında Aqyarda Şevçenko eykeline çeçeklerniñ qoyulması aqqında videoreportaj derc etilecek.
Daa evel Keriç ve Aqmescitte Şevçeko eykellerine çeçekler qoyulğanı aqqında bildirilgen edi.
2016 senesinde Şevçenkonıñ doğğan künü yıllığını Keriç, Aqmescit, Aqyar ve diger şeerlerde qayd ettiler. Kobzarnıñ eykelleri yanında şiirler oqudı ve ukrain türkülerini yırladılar.
В 2015 senesinde Aqmescitte Şevçenko eykeline çeçekler qoyğanda Ukraina tarafdarı olğan faaliyetçilerni polis yaqalay edi.
Mart 9-da Kobzar olaraq da belli olğan Ukraina yazıcısı ve ressamı Taras Şevçenkonıñ doğğan künü qayd etile. O, 1814 senesinde doğdı. Onıñ istidatı rus ve ukrain tilinde şiirler ve nesir yazğanında, bediiy ve grafik icadında, cemiyet faaliyetinde ve beñzer faaliyetlerde öz ifadesini taptı. Ukrainler içün Şevcenko, özlerini bir millet olaraq tanuv elementlerinden biridir.
