Ukraina Tış işler Nazirligi (TİN), Rusiyede ve işgal etilgen Qırımda tutılğan Ukraina siyasiy mabüsleri - Oleg Sentsov ve Volodımır Baluhnıñ deral azat etmesini Kremlden talap etti. Olar narazılıqnı bildirip açlıq tuta.
Avgust 31-inde Ukraina Tış işler Nazirliginiñ spikeri Maryana Betsa Twitterde bildirgenine köre, Rusiyege basqınç yükselmeli.
“Baluh 166 kün açlıq tuta, Sentsov ise - 110. Kene de Rusiyeden olarnıñ azat etmesini talap etemiz. Rusiyege basqınç yükselmeli”, - dep yazdı Maryana Betsa.
166 днів голодує Балух.110 -Сенцов. Вкотре вимагаємо від РФ їхнього негайного звільнення.Тиск на РФ має посилюватись pic.twitter.com/2Rq0o6kFAH
— Mariana Betsa (@Mariana_Betsa) 31 серпня 2018 р.
Avgust 30-ında Minskte bulunğan Üç taraflı kontakt gruppasında Ukraina vekili, Yuqarı Radanın vitse-spikeri İrına Geraşçenko, mahküm etilgen ukrain faalcisi Vladimir Baluh ve ukrain rejissörı Oleg Sentsovnıñsağlığı yamanlaşqanını bildirdi.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilân etken edi.
Sentsov ve Qırım sakini Aleksandr Kolçenko Rusiye mahsus hizmetleriniñ hadimleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniya cezasına mahküm etti. Kolçenkoğa 10 yıl apis cezası berildi. Ekisi de qabaatını tanımay.
“Memorial” uquqqoruyıcı merkezi Sentsov ve Kolçenkonı siyasiy mabüsler cedveline kirsetti.
Baluh 2018 senesi martnıñ 19-ına başlağan müddetsiz açlıqnı devam etmekte. İyülniñ 5-inde Kremlniñ nezareti altında olğan Aqşeyh (Razdolnoye) rayon mahkemesi ukrain faaliyetçisi Volodımır Baluhnı 5 yılğa umumiy rejimli koloniyağa ve 10 biñ ruble (qararnen 4 biñ hrivna) cöremege mahküm etti.
Rusiye FSB-si Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar dep iddia ete ediler. Baluhnıñ imayecisi ve uquqqorucılar, onıñ Ukraina vatanperver olğanı sebebinden, yani eviniñ azbarında Ukraina bayrağı olğanı içün, repressiyalar qurbanı olğanını iddia eteler