Qırımda apiske alınğan ve aq qorçalayıcı teşkilâtlar tarafından Kremlniñ siyasiy mabüsi olaraq tanılğan qırımtatar faali, siyasetçi ve jurnalist Nariman Celâl bundan evel qoltutuv sözlerinen yazğan mektüplerini aydınlatqan ukrainalı aq qorçalayıcı, faal, yazıcı, jurnalist ve memurlarğa muracaat etti. Qırım.Aqiqat Nariman Celâlnıñ mektüp metnini derc ete.
Qıymetli dost ve zenaatdaşlarım! Qoltutqanıñız içün sağ oluñız!
Siznen bir yolnen ketmek menim içün şereftir. Aynı qıymetlernen yaşamaq ve aynı maqsadnen küreşmek
Siznen bir yolnen ketmek menim içün şereftir. Aynı qıymetlernen yaşamaq ve aynı maqsadnen küreşmek: devletimizniñ inkişafı ve pekitilüvidir.
Bugünki sınavlar – şahsiy ve umumiy – sovet keçmişinden zemaneviy demokratik memleketke ketkenimiz eski alına qaytmaycağını kefalet ete, dep ümüt etem.
Bizim vazifemiz – devlet ve cemaat sağlığını pekitmektir
Ne yazıq ki, Rusiye imperiya hastalığınıñ tekrarlanmasını keçirip, hastalıq alını qaldırmağa ve tek özüniñ degil, bizim de islâatlarımızğa sert bir şekilde mania olmağa tırışa.
Eminim, telükelerge baqmadan, Ukraina ve ukrainalılar bu hastalıqqa qarşı immunitetini isbatladılar. Ve bizim vazifemiz – devlet ve cemaat sağlığını pekitmektir.
Birinciden – milliy suverenitetni ğayrıdan tiklemek.
2022 senesi fevralniñ 1-i
Your browser doesn’t support HTML5
«Rusiye quvetçileri saba 7-de evimizge sürip kirdi»: Nariman Celâlnıñ ömür arqadaşı tafsilâtlarnı aydınlattı
Qırımtatar faali, siyasetçi ve jurnalist Nariman Celâlnıñ muracaatını «Vidrocennâ» fondunıñ icra müdiri (1998-2017 seneleri), felsefe ilimleri doktorı Yevğen Bıstrıtskıy Facebook saifesinde derc etti.
Qırım.Aqiqat, Qırımda apiske alınğan qırımtatar faali, siyasetçi ve jurnalist Nariman Celâlnıñ (vesiqalarda – Celâlovnıñ) yazğanlarını derc ete. Evelki mektüpni mında oqumañız mümkün.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.