Qırımtatar faali, siyasetçi ve jurnalist Nariman Celâl – İnsan aqları künü munasebetinen.
İnsanlar halqara vesiqalarda ve milliy qanunlarda qayd etilgen aq ve azatlıqları içün küreşmege mecbur
İnsan aqları beyannamesi qabul etilgen kününden on yıllar keçse de, serbest insanlar halqara vesiqalarda ve milliy qanunlarda qayd etilgen aq ve azatlıqları içün küreşmege mecbur.
Vatandaşlar devletleri tarafından zulumğa oğratıla.
Suveren devletler qomşularnıñ silâlı tecavuzına qarşı tura.
Ukrainamız milliy birlik, siyasiy kemal, bir qısmı işğal altındaki topraqlarda vatandaşlarını qorumaq istegi ve becerikligi olğan arbiy barlıqlılıq imtianını bermege devam ete.
Qırımda Ukraina vatandaşlarınıñ birinci vazifesi – Rusiye mefküreviy istilâsına dayanıp, serbest dünyağa mensüpligini saqlap qalmaqtır
İşğal etilgen Qırımda Ukraina vatandaşlarınıñ birinci vazifesi – Rusiye mefküreviy istilâsına dayanıp, serbest dünyağa mensüpligini saqlap qalmaqtır.
Demokratiya qıymetleri, insan aqları em insanlar arasında, em devlet ve vatandaşlar arasında munasebet emri olğan cemiyette yaşamaq ıntıluvı aqılda qalmalı.
Ve eñ esası, dostlar, beraber kösterilgen ğayretlernen duşman yeñilecegine inanıñız.
Amma ğayret etiñiz!
Qırımda apiske alınğan qırımtatar faali, siyasetçi ve jurnalist Nariman Celâlnıñ muracaatını dekabrniñ 10-nda advokat Nikolay Polozov Facebook saifesinde derc etti.
MALÜMAT: Halqara insan aqları künü er yıl dekabrniñ 10-nda qayd etile. 1948 senesi bu künü BM Baş Assambleyası Umumiy insan aqları beyannamesini qabul etti.
Rusiye akimiyeti ile dialog qurmaq imkânsız, dep aytqan edi: Qırımda tutulğan Nariman Celâl nenen belli (fotoresimler)
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
Nariman Celâl, qırımlı jurnalist, qırımtatar milliy areketiniñ iştirakçisi