Kyivde mayısnıñ 18-nde qırımtatar sürgünligi qurbanlarınıñ hatırasına bağışlanğan avtoyürüş keçirmege planlaştıralar. Avtoyürüşni Rusiye işğal etken Qırımdan köçip kelgenler teşkil ete.
«Bu yıl (koronavirusnen bağlı – QA) karantin sıñırlavları şeerlerniñ merkeziy meydanlarında ananeviy matem mitingine toplaşmağa imkân bermeycek. Qırım işğalinden soñ yedi yıldan berli biz, mecburen köçip kelgenler, vatanımızda toplaşıp olamaymız. Şunıñ içün qırımtatar genotsidiniñ 76-ncı yılında istegen er keske qırımtatar halqı sürgüligi qurbanlarınıñ hatırasına bağışlanğan avtoyürüşke qoşulmağa teklif etemiz», – dep qayd etti teşkilâtçılar.
Olarnıñ malümatına köre, Kyiv avtoyürüşiniñ iştirakçileri mayısnıñ 18-nde saat 16:30-da Halqara sergi Merkezi yanındaki (Brovarskıy caddesi, 15) büyük park alanında toplaşacaq. Avtokolonnalar şekillendirilgen soñ, yürüş iştirakçileri saat 17:00-da Metro Köpründen Mustaqillik Meydanına qadar ketecek.
Qırımtatar Milliy Meclisiniñ reisi Refat Çubarov qırımtatar halqı genotsidiniñ qurbanları hatırasına bağışlanğan añma merasimleri endi tasdıqlandı, dep bildirdi ve olarnıñ cedvelini derc etti. Onıñ aytqanına köre, olar mayısnıñ 18-nde ve onıñ arfesinde Ukrainada, hususan işğal etilgen Qırımda ve diger memleketlerde keçirilecek.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.