Koronavirusnen bağlı vaziyet sebebinden Qırımda tibbiy nezaret altında bulunğan insanlarnıñ sayısı martnıñ 21-nde 100-ge arttı.
Bu aqta Qırımnıñ Rusiye Sağlıq naziri İgor Çemodanov martnıñ 22-nde koronavirus qırğınlığınıñ tarqalmaması operativ ştabınıñ toplaşuvında bildirdi, dep haber ete Qırımnıñ Rusiye akimiyetine yaqın olğan «Krıminform» neşiri.
«Tünevinden berli bir kün içinde 100 insan daa qoşuldı, er biri baqıla. Bugünki künde Qırımda 413 insan közetile. 35 kişi statsionarda buluna. Tünevin sıñırda üç kişiniñ ve ava limanında eki kişiniñ talilini aldıq», – dep bildire Çemodanovnıñ aytqanlarını kütleviy haber vastası.
Onıñ bildirgenine köre, Qırımda koronavirusnen hastalanğan ilk kişiniñ alı bir qarar.
«Onıñ alı bir qarar, sıcağı yoq, öksürmey, alı normağa uya. Onıñ sağlığınen bağlı bir telüke körmeymiz», – dedi memur.
Qırımnıñ Rusiye ükümeti baş naziriniñ muavini İgor Mihayliçenkonıñ bildirgenine köre, Qırımda koronavirus hastasınen alâqada olğan bütün insanlar ve onı alıp ketken taksi aydavcısı belli ve tecrit etildi.
Martnıñ 21-nde bildirilgenine köre, Qırımda ve Aqyarda 417 insan koronavirus sebebinden tibbiy nezaret altında qala.
Qırımda ilk koronavirus hastası bar dep tasdıqladılar.
Martnıñ 19-nda Qırımdaki Rospotrebnadzor idaresi, yarımadanıñ tibbiy müessiselerinde «telükeli memleketlerden keskin virus yuqunçı alâmetlerinen» 18 insan buluna, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.