Bazarertesi künü, noyabr 18-inde, bir yıl evel Rusiye FSB-si tarafından Keriç boğazında zapt etilgen Ukraina Arbiy Deñiz Quvetleriniñ üç gemisi qaytarıldı. Ukraina Arbiy Deñiz Quvetleriniñ komandalığı, "Nikopol", "Berdânsk" katerleri ve "Yañı Qapu" buksiriniñ qaytarılması başlandı, dep bildirdi.
"Şimdi "Titan", "Ğaydamaki" ve "Sapfir" gemileri, kateler ve buksirnen beraber qıta Ukrainağa taba yol aldı", - denile Ukraina Arbiy Deñiz Quvetleri matbuat hızmetiniñ beyanatında.
"Bu gemiler, alâ daa sıñrımıznıñ qanunsız keçmesi aqqında cinaiy davada maddiy dedil sayılmaqta. Rusiye organları kerekli tahqiqiy tedbirlerni bitirgeni içün, gemilerniñ ileride Rusiye topraqlarında bulunması şart degil, böyleliknen, olarnı Ukraina tarafına bermek imkânı peyda oldı", - denile Rusiye Tış İşler Nazirliginiñ beyanatında.
Bundan ğayrı, Tış İşler Nazirligi, Rusiye, ukrain gemilerniñ Keriç boğazından keçmesini alâ daa "provokatsiya" dep sayğanını qayd etti.
"Bu gemiler, alâ daa sıñrımıznıñ qanunsız keçmesi aqqında cinaiy davada maddiy dedil sayılmaqtaRusiye Tış İşler Nazirligi
"Gemicilikniñ havfsızlığını temin etmek içün, Rusiye tarafı ileride de sıñrı yanındaki provokatsiyalarnı keskin sürette kestirecek", - dediler Rusiye TİN-nde.
Ukraina tarafı, askeriy gemilerniñ berilmesini daa tefsir etmedi. Amma Ukraina Silâlı Quvetlerniñ Arbiy Deñiz Quvetleriniñ başı İgor Voronçenko, bir yıl evel Keriç boğazında zapt etilgen gemilerniñ Qırımdan qaytarılması plan boyunca yapıla, dep haber etti. "İş baslandı. Zabitler añlaşılğan noqtadalar. Er şey plan boyunca", - dedi Voronçenko.
Saat 10:50 (Kyiv vaqtınen), zapt etilgen gemilerni almaq içün ketken, "Titan" ve "Ğaydamaka" eki ukrain buksiri, Keriç boğazına yaqınlaşa edi ve Opuk burnu yanında buluna edi. Üçünci gemi - "Sapfir" qıdıruv ve qurtatıcı gemisi, Sudaqnıñ yanında edi. Bunı MarineTraffic saytınıñ malümatı köstere.
Rusiye advokatı Nikolay Polozovnıñ aytqanına köre, Rusiye, ukrain gemilerni qaytarıp, BMT-niñ Askeriy Mahkemesiniñ ükmüne yerine ketire, dep saymaq mümkün. Bunı o, Qırım.Aqiqat Radiosı efirinde ayttı.
Mahkeme qararını ömürge keçirmek Rusiye içün pek müim bir şeydirNikolay Polozov
"Bu yalıñız mahkeme qararınıñ icrasıdır. Rusiye akimiyetiniñ tecavuzkâr ritorikasını ve ayatta yapqan areketlerini ayırmaq kerek. Mına olar (Rusiye) deyler ki: biz mahkemeniñ yurisdiktsiyasını tanımaymız, oturışlarında iştirak etmeycekmiz. Amma buña baqmadan bütün protsesslerde iştirak ettiler, kerekli esabatlarnı berdiler. Mahkeme qararını ömürge keçirmek olar içün pek müim bir şeydir", - dedi Polozov.
Onıñ fikrince, Rusiye, Gaaga mahkemesiniñ ükmüni icra etkenini açıqtan köstermege ve tanımağa istemey. "Olar daima yañı şekillerni uydura. Nisal içün, deñişüv. Ya da şimdi kibi gemilerniñ qaytarılması. Ancaq fakt qalır. Deñizciler artıq evdedir, gemilerni yaqında qaytarırlar", - dedi advokat.
Amma Rusiye prezidentiniñ matbuat kâtibi Dmitriy Peskov, FSB zapt etken gemilerniñ Kyivge qaytarılması, mayısta çıqarılğan gemilerni qaytarmaq Halqara mahkemeniñ ükmünen bağlı degil, dep ayta.
"Bu Halqara mahkemenen asıl bağlı degil. Mında iç bir alâqa yoq ve ola bilmez", - dedi Peskov noyabr 18-inde Rusiye jurnalistlerine.
Peskov, Ukrainağa arbiy gemilerniñ qaytarılması aqqında tefsir almaq içün Rusiye FSB-sine muracaat etmege tevsiye etti.
Halqara mahkemeniñ ükmü esas maqsat olmadı ve alâ daa degildir. Maqsadımız - uquq bozulmasını belgilemek ve onıñ kompensatsiyasını almaqtırYelena Zerkal
Ukraina Tış İşler naziriniñ müavini Yelena Zerkal, Ukraina arbiy gemileri ve olarnıñ ekipajınıñ zapt etilmesi vaqtında BMT-niñ Deñiz uquqı aqqında Konventsiyasının bozulmasına itibaren davanıñ ilk arbitraj diñlevleri noyabr 21-inde keçirilecek, dep qayd etti.
"Halqara mahkemeniñ ükmü esas maqsat olmadı ve alâ daa degildir. Maqsadımız - uquq bozulmasını belgilemek ve onıñ kompensatsiyasını almaqtır. Bu,TİN-niñ 2019 senesi aprel 1-inde berolgen iddiasında kösterilgen", - yazdı Zerkal Facebookta.
Noyabr 17-sinde Qırımda Rusiye FSB-siniñ sıñır idaresiniñ matbuat hızmetine atıf etip TASS haber agentligi, zapt etilgen gemilerni noyabr 18-inde berecekler, dep yazdı.
Qırım matbuatınıñ malümatına köre, "Berdânsk" ve"Nikopol" arbiy katerleri ve "Yañı Qapu" buksiri Ukrainağa neytral suvlarda berilmek kerek.
Захваченные украинские корабли вывели из акватории Керчи (фотогалерея)
Qırım.Aqiqat daa evel haber etkeni kibi, bazar künü noyabr 17-sinde Keriçte "Genmol" limanınıda tutulğan "Berdânsk" ve "Nikopol" zapt etilgen ukrain katerlerni yollamaqqa azırlap başladılar.
Мarine Тraffic halqara gemi közetüvi bazasınıñ malümatına köre, "Sapfir", "Titan" ve "Ğaydamaka" ukrain buksirleri Qara deñizde Qırım yalısına taraf yol aldı.