Keriç boğazında FSB tarafından açılğan ateş neticesinde altı Ukraina deñizcisi yaralandı. Ukraina Arbiy deñiz quvetleriniñ matbuat hızmetiniñ bildirgenine köre, çekilgen «Berdânsk», «Nikopol» katerlerive «Yañı Qapu» reyd buksiri zapt etilip, rusiye mahsus quvetler idaresine keçti. AQŞ BMT-nıñ Havsızlıq Şurasınıñ acele oturışuvı çağırta.
Keriç boğazında FSB tarafından açılğan ateş neticesinde altı Ukraina deñizcisi yaralandı. Ukraina Arbiy deñiz quvetleriniñ matbuat hızmetiniñ bildirgenine köre, çekilgen «Berdânsk», «Nikopol» katerleri ve «Yañı Qapu» reyd buksiri zapt etilip, rusiye mahsus quvetler idarine keçti.
“Tez malümatımızğa köre, “Berdânsk”, “Nikopol” küçük zırhlı artilleriya katerleri duşman ateşinen uruldı ve yürüv qabiliyetini coydı. “Yañı Qapu” reyd buksiri de toqtanmağ mecbur edi. Gemiler Rusiye spetsnazınen (mahsus quvetler) zapt etildi. Bundan ğayrı, yaralanğan ukrain deñizcileri aqqında haber bar”, - deñile beyanatta.
Ukraina silâlı Quvetleri, Ukraina havfsızlıq Hızmetiniñ şahsiy taqımı ve Ukraina İçki İşler Nazirliginiñ bütün bölükleri tolu cenk azırlığını kördi.
Rusiye 20-den ziyade Ukraina askerini esir aldı – Babin
Noyabrniñ 25-nde Keriç boğazında üç Ukraina arbiy katerine yapılğan ücüm neticesinde Rusiye 20-den ziyade Ukraina askerini esir aldı.
Bu aqta noyabrniñ 26-na keçer gecesi Ukraina prezidentiniñ Qırım Muhtar Cumhuriyetindeki daimiy temsilcisi Boris Babin Facebookta yazdı.
«İstilâcı gemi ve ekipajlarını zapt etkenini tasdıqladı. Belli qararlarnıñ alınması içün tam bir vaqıt – ya da başka imkân olmaycaq kibi bir telüke bar», – dep yazdı Babin.
Qara deñizde rusiyelilerniñ tarafından silâlı ücüm neticesinde zapt etilgen “Berdânsk”, “Nikopol” ve “Yañı Qapu” ukrain arbiy gemileri “Keriç” limanına (Qırım ilhağından soñ Kyiv tarafından qapatılğan liman) ketirildi, dep yaza Rusiye ve Qırım habercileri (daa evel bunı Qırımdaki Rusiye FSB idaresi haber etti).
Kerç.FM saytı, “Keriç merkeziniñ” yalısında iskelege yanaşqan gemilerniñ videosını yayınladı.
Bu malümatnı TASS ve “RİA Novosti” rusiye haber agentlikleri de süretlernen tasdıqlay.
Bundan ğayrı, Rusiye kütleviy haber vastalarınıñ bildirgenine köre, FSB «Rusiye Ceza kodeksiniñ 322-nci maddesiniñ 3-ünci qısmı boyunca (devlet sıñırından qanunsız keçüv) cinaiy dava açtı».
FSB, «Qara deñizde Kyiv tarafından Ukraina Arbiy deñiz quvetleriniñ küçünen azırlanğan provokatsiya ve onıñ kerçekleştirilmesiniñ delillerini aydınlatmağa» vade etti.
Rusiye, ukrain gemilerinen ücümini "Kyiv provokatsiyası" dey
Rusiyede, rusiye arbiyleri ve sıñırcılları üç ukrain gemisine ücüm ve zapt etkeninden soñ, “Kyiv provokatsiyası” aqqında beyan ettiler. Ücüm vaqtında atışlar yüzberdi ve, soñ malümatqa köre, altı ukrain arbiy deñizcisi yaralandı.
Hususan, Rusiye FSB-si, «Qara deñizde Kyiv tarafından Ukraina Arbiy deñiz quvetleriniñ küçünen azırlanğan provokatsiya ve onıñ kerçekleştirilmesiniñ delillerini aydınlatmağa» vade etti, amma ne “delilleri” o bildirmedi.
Ukrain akimiyeti tarafından “provokatsiya” aqqında, Ukraina tarafına aqaretleyici laflarınen belli, Rusiye Tışqı İşler Nazirliginiñ reisi Mariya Zaharova da beyan ete edi.
Rusiyeniñ Tışqı işler Nazirliginiñ matbuat kâtibi Mariya Zaharova
“Özleri de aydut, usulları da aydutlarda kibi: başta provokatsiya, soñra küç basqısı, soñ ise tecavuzda qabaatlav”, - yazdı o Facebookta, amma, onıñce, ukrain tarafınıñprovokatsiyası nede olğanını añlatmadı.
Ukraina Tış işler naziri Arsen Avakov «Don» Rusiye gemisiniñ Ukraina buksirine çarpqanınıñ videosını aydınlattı. Adise noyabrniñ 25-nde saba yüz berdi.
«Ukraina Tış işler nazirligi mahsus vastalardan faydalanıp, «Don» Rusiye sıñır gemisiniñ Ukraina gemisine çarpqanınıñ provokatsiya videosını elde etti. Rusiyeliler çıqarğan video alındı, emirler eşitile – halqara mahkemede delil olacaq!», – dep yazdı Avakov Twitter saifesinde.
Rusiye gemisi ukrain buksirini çarpqan videosı:
Rusiyeniñ deñizdeki tecavuzı sebebinden Ukraina AQŞ-na muracaat etti - elçi
Ukrainanıñ AQŞ-nda elçisi Valeriy Çalıy, ukrain taraf “amerikan ortaqlarını Ukrainağa qoltutmağa çağırtıp muracaat etti”, - dep haber etti. Buña cevap olaraq AQŞ “vaziyetniñ ilerlevüne diqqatlı olacaqlarında ve kerginleşkenine yol bermemek içün tedbirler azırlaycağında işandırdı”.
“Strategik ortağımıznıñ destegine ümüt etemiz”, - qoştı Çalıy.
“Rusiye, Ukraina Arbiy deñiz quvetleriniñ gemileri ve hadimlerine qarşı küç qullanğanı - provokatsiyadır, ve bu Ukrainağa qarşı olğan Rusiye tecavuzını yañı seviyege kötere. Qara ve Azaq deñizlerinde böyle areketler tek halqara uquq normaları bozmay, o aqiqiy cenk çataşmanıñ havfı ve Qara deñiz yalısındaki bütün devletlerniñ havfsızlığına telükedir”, - dep qayd etti elçi.
Poroşenko Azaq deñizinde fevqulade vaziyet sebebinden arbiy muşavere topladı - spiker
Ukraina prezidenti Petro Poroşenko “Azaq deñizinde fevqulade vaziyet” sebebinden arbiy muşavere topladı, dep haber etti onıñ spikeri Svâtoslav Tsegolko.
“Azaq deñizinde fevqulade vaziyet sebebinden prezident arbiy muşavere topladı” - yazdı Tsegolko öz Twitter saifesinde.
Bundan evel rusiye gemileri, Keriç boğazından çıqmağa ıntılğan Ukraina Arbiy deñiz quvetleriniñ gemi taqımına qarşı silâ qulanmasınen qorquttı.Ukraina Arbiy deñiz quvetleriniñ matbuat hızmeti haber etkeni kibi, rusiye gemileri ukrain gemilerini izlep, toqtanmasını talap etti, akis alda ise silâ qulanacaqlarını bildirtti.
Avropa Şurasında Ukrainanıñ daimiy vekili - “Rusiye, deñiz cenkini açmaq niyetinen Ukrainağa provokatsiya yapa”
Rusiye, Keriç boğazında ve Azaq ve Qara deñizlerindeki areketlerinen deñiz cenkini açmaq niyetinen Ukrainağa provokatsiya yapqanını” bildire. Böyle fikirni Avropa Şurasında Ukrainanıñ daimiy vekili Dmitriy Kuleba ifade etti.
“Rusiye Ukrainanı Azaq deñizinden sıqıştırıp çıqarmağa tırışa. Soñki vaqialar Rusiye, deñiz cenkini açmaq niyetinen Ukrainağa provokatsiya yapqanını köstere. Bu - Rusiyeniñ Ukrainağa qarşı yañı tecavuz cebbesi”, - dep yazdı Twitterde diplomat.
O, bunı Kyiv ve Ukrainanıñ halqara ortaqları yahşı körüp añlağanını qoştı.
“Raatsızlıqnı bildirmek vaqtı endi keçti. Ukraina öz işini yapacaq. Amma bundan ğayrı, Rusiye vaziyetni kerginleştirmesin dep ortaqlarımıznıñ diplomatik, sanktsiya ve mudafaa areketleri kerek”, - yazdı Kuleba.
Ukraina, Rusiyeniñ deñizde provokatsiyası sebebinden BMT-nıñ Havfsızlıq Şurasına muracaat ete
“Rusiyeniñ Qara ve Azaq deñizlerinde provokatsiyası” sebebinden Ukraina BMT-nıñ Havfsızlıq Şurasına muracaat ete dep haber etti Ukrainanıñ BMTde daimiy vekili Volodımır Yelçenko.
“Prezidentniñ emrinen BMT-nıñ Havfsızlıq Şurasına acele muracaat etemiz. Tecavuzcınıñ kergin areketlerini tek birleşip toqtatmaq mümkün!”, - dep yazdı Yelçenko öz Twitter saifesinde.
Rusiye tarafınıñ adisenen bağlı izaatları daa yoq.
Noyabrniñ 25-nde Ukraina Arbiy deñiz quvetleri bildirdi ki, Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Aynı vaqıtta, Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra Rusiye Keriç boğazını silâsız gemileriniñ keçmesi içün qapattı. Aynı vaqıtta, Rusiye üç gemisini Keriç boğazından yiberdi, amma Ukraina gemileriniñ Azaq deñizine keçişini blok etmege devam etti.
Ukraina Tış işler nazirligi Rusiyeniñ noyabrniñ 25-nde Qara ve Azaq deñizlerinde yapqanlarını tenqit etti.
Keçenleri Avropa parlamenti Rusiyege qarşı sanktsiyalarnı quvetleştirmege ve Ukrainada deñiz taşımacılığı saasında OSCE missiyasınıñ işini kenişletmege çağırğan qararnı qabul etti.
Bu sene sentâbrniñ 6-nda Ukraina milliy telükesizlik ve mudafaa şurası Azaq deñizinde arbiy-deñiz bulunmasını quvetleştirmege qarar aldı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
