Rusiye tahqiqatı fevralniñ 17-nde FSBniñ musulmanlarnıñ (ekseriyeti qırımtatarı) evlerinde keçirgen kütleviy tintüvlerinden soñ tutulğan Azamat Eyupovğa psihiatrik ekspertiza yapılmasını istedi.
Bu aqta advokat Emil Kurbedinov Qırım.Aqiqat mühbirine bildirdi.
«Bugün müvekkilimnen FSB binasında olğanda Azamat Eyupovğa hastahanede psihiatrik ekspertiza yapılacağını bildim. Fikrimizni bildirdik – bu tamamen qanunsız bir şey, onı Aqmescit psihiatrik hastahanesine yerleştirmek içün bir sebep yoq. Tahqiqat, qabaatlanğanlar cinaiy mesüliyetten çekilmesin dep, er vaqıt psihiatrik ekspertiza keçire. Ambulator ekspertiza aqqında aytamız, bizde olğanı kibi hastahanedekini aytsaq, daa İlmi Umerovnıñ (Qırımtatar Milliy Meclisiniñ reis muavini – QA) davasından berli tahqiqat insanlarğa basqı yapmaq içün bu aletni qullana, insanlarnı dayanılmaycaq şaraitlerge yerleştireler», – dep qayd etti Kurbedinov.
Advokatnıñ aytqanına köre, ondan «ilk tahqiqat malümatlarını bildirmemesi içün senet alacaq ediler».
«Menden tahqiqat malümatlarını aydınlatmaycağıma dair senet alacaq ediler. Mence, FSB hadimleri advokatnıñ yañlışını tapıp, ileride şantaj yapacaq ola. Başqa bir şey aytıp olamayım. Bu tamamen qanunsız olğanını qayd ettim, ve, ebet, bu senetni imzalamadım», – dep qoştı Kurbedinov.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ evlerine keldi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Tutulğanlarnıñ soy-sopları tintüvlerden soñ bildirgenine köre, Rusiye quvetçileri Ukraina pasportlarını da aldı.
Your browser doesn’t support HTML5
Qırım: Rusiye quvetçileri yarımadanıñ bir qaç rayonında musulmanlarnıñ evlerini tintti (video)
Qırım Muhtar Cumhuriyeti ve Aqyar prokuraturası fevralniñ 17-nde Qırımda keçirilgen kütleviy tintüvler sebebinden cinaiy tahqiqat başlatıldı, dep bildirdi.
Ukraina prezidentiniñ Qırım Muhtar Cumhuriyetindeki daimiy temsilciligi Rusiye quvetçileriniñ Qırımda musulmanlarnıñ (ekseriyeti qırımtatarı ola) evlerinde keçirgen tintüvleri aqqında malümat Ukraina uquq qoruyıcılarına berile ve «milliy ve halqara seviyedeki işte» qullanılacaq, dep bildire.
Ukraina Tış işler naziriniñ birinci muavini Emine Ceppar Rusiye quvetçileriniñ qırımlılarnıñ evlerinde keçirgen tintüvlerini «cezalav ve qorquzuv şekli» dep adlandırdı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.