Mayısnıñ 11-nde Akmescit civarındaki Dubki köyünde keçirilgen tintüv vaqtında Rusiye FSBsiniñ hadimleri Qırımda yaşağan Özbekistan vatandaşı Nabi (Ayub) Rahimovnı atıp öldürdi.

«Aqmescitteki Dubki mikrorayonında yaşağan evinde musulman, özbek Ayub (Nabi) Rahimov atıp öldürildi. Tünevin onı Aqmescit rayonındaki Aq-Meçette iftarda körgenler. Tanışları ve qomşularınıñ aytqanına köre, erkek iftarlarğa aş pişirip para qazana edi. Quvetçilerniñ aytqanına köre, o, tintüv vaqtında tirendi, amma 80-den çoq qabaatsız insannı – qırımtatarını – apiske tıqtırğan insanlarğa inanmağa aşıqmayım», – dep yazdı «Qırım birdemliginiñ» faali Lutfiye Zudiyeva Facebook saifesinde.

Lutfiye Zudiyeva

«İşğal başlağanından berli böyle adiseler daa olmağan edi»

Qırımda Özbekistan vatandaşı öldürilgenini Qırımtatar Milliy Meclisiniñ reisi Refat Çubarov da Facebookta canlı yayında tasdıqladı.

«Rahimov tutulğanda tirengen ve atıp öldürilgen eken. Yani FSB hadimleri tirengenini ayta. Öldürilgen Nabi Rahimovğa ait kibi tanıtılğan granata ve silâ parçalarını köstereler. Amma insanlarnı öldürgen FSB usullarını yahşı bilemiz. Silâ qoyalar ve öldürilgen «terrorist» ve «ekstremistke» ait olğanını aytalar», – dep bildirdi Çubarov.

Dubki köyünde tintüv, 2021 senesi mayısnıñ 11-i

O, Qırım işğali başlağanından böyle adise ilk sefer olğanını ayttı.

«İşğal başlağanından FSB hadimleri insanlarnıñ evine sürip kirse, olarnı öldürse ve silâ qoysa, soñra ise tirengenleri içün öldürilgenini aytqanlarını daa körmegen edik. Bu ilk oldı», – dep qayd etti Meclis reisi.

Refat Çubarov

«Qırım birdemligi» cemaat birleşmesiniñ Qırım.Aqiqatqa bildirgenine köre, saat 14:00-larda Dubkideki evge ritual hızmet maşinası keldi.

Dubkide ritual hızmet arabası, 2021 senesi mayısnıñ 11-i

Qomşularnıñ faallerge tarif etkenine köre, saba erte quvetçiler keldi, soñra ateş sesleri eşitildi ve azbarda insanlar çapqaladı.

«Olarnıñ (Rusiye quvetçileriniñ – QA) aytqanına köre, onıñ (Rahimovnıñ – QA) silâsı bar edi, o, ateş açtı, RGD granatası bar edi. Tam olaraq bilmeymiz», – dedi birleşmege advokat İslâm Velilâyev.

İslâm Velilâyev

Qırım uquq qoruyıcıları resmiy izaat bermey.

«Belli olmağan allar altında öldürildi»

Esas Ukrainadaki Qırım Muhtar Cumhuriyeti ve Aqyar Prokuraturası Aqmescit civarındaki Dubki köyünde Özbekistan vatandaşı Ayub (Nabi) Rahimovnı öldürüvnen bağlı allarnı bilmek içün «bütün kerekli tedbirler» ala, dep bildire.

«Bugün Qırım Muhtar Cumhuriyetiniñ Aqmescit rayonındaki Dubki köyünde işğalci devletniñ «uquq qoruyıcı organlarınıñ» vekilleri keçirgen qanunsız tintüv vaqtında Özbekistan vatandaşınıñ belli olmağan allar altında öldürilgeni belli oldı. Şimdi prokuratura adiseniñ bütün allarını bilmek ve ilerideki uquqiy tasnif içün kerekli tedbirler ala», – dep bildirdi müessiseniñ matbuat hızmeti.

Hatırlatamız, мayısnıñ 11-nde saba faaller Qırımda İçki rayonınıñ Yanış Taqıl (Zavetnoye) köyünde Ayub Rahimovnıñ evinde keçirilgen tintüv aqqında bildirdi. Qırım Muhtar Cumhuriyetiniñ prokuraturası Qırımda keçirilgen tintüv ve tutuvlarnen bağlı cinaiy tahqiqat başlattı.

«Qırım birdemligi» cemaat birleşmesi Qırım.Aqiqatqa bildirgenine köre, Aqmescit civarındaki Dubki köyünde daa bir tintüv başlandı. Ayub Rahimovnıñ anda bulunğanı tahmin etilgen edi.

Mayısnıñ 11-nde aqşam Lutfiye Zudiyeva, öldürilgen Ayub (Nabi) Rahimovnıñ ömür arqadaşı Sahiba Burhanova Qırım ve Aqyardaki Rusiye Tahqiqat komitetiniñ binasında buluna, dep bildirdi. Burhanova ve 15 yaşında oğlu Taqyudinniñ bulunğan yeri Yanış Taqıldaki tintüvden soñ belli degil edi.