Avropa insan aqları mahkemesi, mahkeme reglamentiniñ 39-ıncı qaidesine köre, Qırımda tintüv vaqtında öldürilgen Özbekistan vatandaşı Nabi Rahimovnıñ ömür arqadaşı Özbekistan vatandaşı Sohiba Burhanovanen bağlı qarar çıqardı. Avropa insan aqları mahkemesiniñ qararına köre, mahkeme Burhanovanı Özbekistanğa quvuv qararını qabul etip olamaz. Bu aqta mayısnıñ 27-nde advokat Darya Trenina Qırım.Aqiqat mühbirine bildirdi.
«Sohiba Burhanovanıñ istinaf şikâyeti baqılmazdan evel Avropa insan aqları mahkemesine muracaat ettik. Özbekistanğa qaytarılsa, anda işkencege oğratılacaq, dep aytamız. Avropa mahkemesine muracaat etip, 39-ıncı qaide qullanılmalı, dep iqna etip oldıq. Bu nasıl çalışa: Avropa mahkemesi sürgün etilmesi içün sebep yoq, dep qayd ete. Rusiye akimiyeti çoqusı allarda Avropa mahkemesiniñ böyle qararlarını yerine ketire ve insannı böyle telüke olğan memleketke sürgün etmey. Soñra sürgün qararına qarşı şikâyet arizasını beremiz, yarın lâğu etilmese, Avropa mahkemesi baqmağa devam etecek. Mahkeme bu şikâyetni baqqanda onı Özbekistanğa sürgün etip olamazlar», – dep ayttı Darya Trenina.
Advokatnıñ aytqanına köre, Avropa insan aqları mahkemesi insannıñ ayatı ve sağlığına zarar ketirüv telükesi olğanda 39-ıncı qaideni qullana.
Tintüv vaqtında öldürilgen Özbekistan vatandaşı Nabi Rahimovnıñ ömür arqadaşı Sohiba Burhanovanıñ temyiz şikâyeti mayısnıñ 28-nde baqılacaq.
Advokat Marina Dubrovina Moskva kontrolindeki Qırımnıñ İçki rayon mahkemesiniñ Sohiba Burhanovanı azat etip Rusiyeden ketmesi içün quvma qararını lâğu etmege rica etecek ola.
SEE ALSO: Qırımda FSB adamnı atıp öldürdiMayısnıñ 14-nde Rusiyeniñ Krasnodar ülkesindeki Çetel vatandaşlarını vaqtınca tutuv merkezinde advokatlar Edem Semedlâyev ve Siyar Paniç Sohiba Burhanovanı ziyaret etti.
Daa evel belli olğanına köre, Sohiba Burhanova çetel vatandaşı ya da vatandaşlıqsız şahıs tarafından Rusiyege kiriş qaidelerini ya da bulunuv rejimini bozğanında (Rusiye Memuriy bozuv kodeksiniñ 18.8 maddesiniñ 1.1 qısmı) qabaatlana.
Hatırlatamız, mayısnıñ 11-nde İçki rayonınıñ Yanış Taqıl (Zavetnoye) köyünde tintüvden soñ Nabi Rahimovnıñ ömür arqadaşı Sohiba Burhanova ve 15 yaşında oğulları Taqyuddinni tapıp olamağan ediler. Faaller, qadınnı İçki rayonındaki Rusiye İç işler nazirliginiñ migratsiya meseleleri bölügine alıp ketkenler, dep bildirgen edi.
Mayısnıñ 11-nde saba faaller Qırımda İçki rayonınıñ Yanış Taqıl (Zavetnoye) köyünde Ayub Rahimovnıñ evinde keçirilgen tintüv aqqında bildirdi.
Daa soñra «Qırım birdemligi» cemaat birleşmesi Aqmescit civarındaki Dubki köyünde daa bir tintüv başlandı, dep bildirdi. Anda İçki rayonı Yanış Taqıl (Zavetnoye) köyündeki evinde tahqiqat tedbirleri keçirilgen Ayub Rahimov buluna, dep tahmin etilgen edi.
Qırım ve Aqyardaki Rusiye Tahqiqat komitetiniñ idaresi «uquq qoruyıcı organları hadimleriniñ ayatına qast etkeninden» şübheli sayılğan 49 yaşında Aqmescit sakinine qarşı cinaiy dava açıldı, dep bildirdi. Müessise, erkek «operativ vazifede» olğan FSB hadimlerine qarşı ateş açtı, dep bildirdi.
Şübheliniñ adı ve soyadı, adiseniñ tafsilâtları Tahqiqat komiteti tarafından aydınlatılmay.
Qırım Muhtar Cumhuriyeti ve Aqyar prokuraturası, Özbekistan vatandaşı Ayub (Nabi) Rahimovnıñ Aqmescit civarındaki Dubki köyünde öldürilüviniñ tafsilâtlarını bilmek içün «kerekli tedbirler» alına, dep bildirdi.