Aqmescitteki Qırım Nazirler şurasınıñ binasına noyabrniñ 9-nda saba avtozak ve bir qaç mikroavtobus keldi. Bina etrafında politsiya hadimleri tura, dep bildire Qırım.Aqiqat mühbiri.
Keçken afta Rusiye kontrolindeki Qırımnıñ milletlerara munasebetler işleri devlet komitetiniñ reisi Albert Kangiyev Nazirler şurasınıñ binası ögünde Qırımnıñ Rusiye yolbaşçısı Sergey Aksenovdan afu soramasını talap etken qırımtatar faallerinen laf etip, bazarertesi künü, noyabrniñ 9-nda, bir qaç qırımtatarınen qapalı bir körüşüv keçirilmesini teklif etti.
Noyabrniñ 6-nda Nazirler şurasınıñ binası ögüne kelgen qırımtatar faalleri ve mabüslerniñ soy-sopları açıq körüşüv ötkerilmesini, hususan Aksenovnıñ çıqıp, Facebookta yazğanlarını izaatlamasını talap etti. Kangiyev böyle körüşüv olmaycaq, dep ayttı. Qırımtatarlar ise Kangiyevniñ teklifini red etti.
Laf Qırımnıñ Rusiye yolbaşçısınıñ Facebookta yazğanları aqqında kete. O, Rusiyeniñ Rostov-na-Donu Cenübiy okrugınıñ arbiy mahkemesi çıqarğan üküm arfesinde Keriç köpründe Rusiye uquq qoruyıcıları dava mabüslerine «qol tutmağa» istegen vatandaşlarnı tuttı, dep bildirdi. Soñra ise «Hizb ut-Tahrir ile alâqalar» ve terrorizmni desteklev» Rusiye qanunlarını boza, dep qayd etti.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi noyabrniñ 3-nde Qurmandaki «Hizb ut-Tahrir davasınıñ» üç mabüsini 42 yılğa apiske üküm etti. Rustem Emiruseinovğa 17 yıl apis cezası berildi, ilk eki yılı apishanede, qalğanı sert rejimde keçecek. Arsen Abhairov 13 yılğa üküm etildi, ilk eki yılı apishanede keçecek. Eskender Abdulganiyev 12 yılğa üküm etildi, ilk eki yılını apishanede keçirecek.
Keriç köpründe keçken gece: qırımlılar «Hizb ut-Tahrir davasınıñ» mabüslerine qol tutıp olamadı
Bu sene yazda qırımtatar milliy areketiniñ veteranları Qırım Nazirler şurasına kelip, Aksenovdan afu soramasını talap etti. Olar Qırım yolbaşçısı qırımtatar halqını terrorizmde qabaatladı, dep ayttı. Laf Aksenovnıñ Facebookta yazğanları aqqında kete. O, yañı «Hizb ut-Tahrir davası» boyunca musulmanlarnıñ tutulğanını izaatlağan edi. FSB areketlerini ise «terrorizm ve ekstremizm ile küreş» dep adlandırdı. Sergey Aksenov qırımtatarlarnen öyle de körüşmedi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.