Qurmandaki «Hizb ut-Tahrir davasınıñ» mabüslerine çıqarılacaq üküm arfesinde qırımlı faaller semetdeşlerine qol tutmaq içün Rostov-na-Donuğa yol aldı. Keriç köpründe aqşam saat 9-larda olarnı Rusiye yol patrul hızmetiniñ hadimleri toqtattı. Tutulğan faallerniñ bildirgenine köre, şahsiyetlerini teşkermek içün pasportları alındı.
Qırım aq qorçalayıcısı Lutfiye Zudiyevanıñ Facebook saifesinde haber etkenine köre, köpürde tahminen eki yüz qırımlı tutuldı, aralarında qadın ve esli-başlı insanlar bar edi. Gece +12 derece olğanda episi soqaqta edi, sıcaq aş ve içecek yoq edi, dep ayta Lutfiye Zudiyeva.
Qırımlı advokat Emil Kurbedinovnıñ fikirince, faallerni «destek istegini yoq etmek» içün tutqanlar.
Saba saat 7-lerde köpürde tutulğanlarğa vesiqaları qaytarıldı. Qırımlılar mahkeme oturışuvına keç qalğanları içün evge qayttı.
Noyabrniñ 3-nde saba saat 10-da Rostov-na-Donu Cenübiy okrugınıñ arbiy mahkeme oturışuvı olıp keçti. Qurmandaki «Hizb ut-Tahrir davası» mabüsleriniñ ükmü çıqarıldı. Rustem Emiruseinovğa 17 yıl apis cezası berildi, ilk eki yılı apishanede, qalğanı sert rejimde keçecek. Arsen Abhairov 13 yılğa üküm etildi, ilk eki yılı apishanede keçecek. Eskender Abdulganiyev 12 yılğa üküm etildi, ilk eki yılını apishanede keçirecek.
Rusiye Yuqarı mahkemesi 2003 senesi «Hizb ut-Tahrirni» «terror» birleşmeleri cedveline kirsetip yasaqladı. Qırım işğalinden soñ yarımadada Rusiye quvetçileri tintüvler keçire ve qırımtatarlarnı tuta. «Hizb ut-Tahrir davaları» boyunca apiske alınğan ve mahküm etilgen qırımlılarnıñ imayecileri olarnıñ taqibi siyasiy sebeplernen bağlı, dep tüşüne.
Facebook Forum