Rusiye kontrolindeki Aqmescit Kiyev rayon mahkemesi mayısnıñ 31-nde qırımtatar faali ve aq qorçalayıcısı Lutfiye Zudiyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 2000 ruble para cezasını berdi. Bu aqta Qırım.Aqiqat mühbiri haber ete.
«Saat on eki olayata, tezden iyünniñ 1-i olacaq, yaz kelecek, bizler ise endi-endi mahkeme binasından çıqtıq. Oturışuv 9 saat devam etti, 5 saat qadı mesleat odasında bulundı. Neticede – 2000 ruble para cezası. Dağ sıçan doğurdı», – dep izaatladı qadınıñ qararını Lutfiye Zudiyeva mahkemeden çıqqan soñ.
Zudiyevanıñ aytqanına köre, oña qarşı memuriy dava aselet açıldı, onıñ «maqsadı itibardan tüşürip», reputatsiyasına zarar ketirmekten ibaret edi. O, özüni qabaatlı dep saymay.
Your browser doesn’t support HTML5
Qırımlı faallerniñ mahkeme künü (video)
Aqmescitniñ Kiyev rayon mahkemesi mayısnıñ 31-nde qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 1000 ruble para cezasını berdi.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı. Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
SEE ALSO: “Qadınlarğa qarşı basqı başlandı”Zudiyevanıñ aytqanına köre, dava malümatlarında qullanıcı Tagir Minibayevniñ 2014 senesi aprel ayında paylaşqan yazısı bar, Zudiyeva anda qayd etile.
Ukraina Tış işler naziri Pavlo Klimkin dünya toplulığını mayısnıñ 30-nda ilhaq etilgen Qırımda tutulğan qırımtatar aq qorçalayıcıları Lutfiye Zudiyeva ve Mümine Saliyevanıñ azat etilüvini talap etmesine çağırdı.
Qırım Muhtar Cumhuriyeti ve Aqyar Milliy politsiyasınıñ baş idaresi yarımadada qırımtatar faalleri Lutfiye Zudiyeva ve Mümine Saliyeva tutulğanından cinaiy tahqiqat açtı.
Al-azırda Qırım ve qomşu Rusiyeniñ müessiseleri bir de bir izaat bermediler.