İlhaq etilgen Qırımda yarım yıl devamında ev tevqifi astında olğan "Veciye Kaşka davası" iştirakçileri, ruhtan tüşmemek qırımtatar halqınıñ destegi yardım ete edi, dep aytıp berdiler. Bunı Qırım.Aqiqat mühbiri bildire.
"Veciye Kaşka davası" iştirakçileri azatlıqta
"Bugün quvanç, dep aytmaq mümkün. Küçük quvanç, amma bu ğalebedir. Ep bir adamlar bu sistemanen küreşni devam etecek, biz de etecekmiz", - dedi dava iştirakçileriniñ birisi Ruslan Trubaç.
"Olarnıñ qol tutuvı olmasa edi, alımız fena olacaq edi. Sağlığımız da yaramay olacaq edi, ruhtan da tüşer edik", - qoştı o.
Rusiye nezaretindeki Qırımnıñ Yuqarı mahkemesi oktâbr 29-ında oturışta "Veciye Kaşka davası" iştirakçileri Asan Çapuhqa, Bekir Degermenci, Kazim Ametov ve Ruslan Trubaçnıñ ükmüne apellâtsiya şikâyetini qanaatlendirmedi.
2019 senesi aprel 7-sinde Rusiye nezaretindeki Aqmescitniñ Kiyev rayon mahkemesi, "Veciye Kaşka davası" iştirakçilerine üküm çıqardı. Asan Çapuhqa üç buçuq yıllıq, Bekir Degermenci, Kazim Ametov ve Ruslan Trubaçqa üç yıllıq şartlı cezanı üküm etti. Üküm apellâtsiyası baqılmağance, iştirakçilerniñ episi ev tevqifi altında bulunacaq. Aynı vaqıtta, bundan evel Bekir Degermenci, Asan Çapuh, Kazim Ametov ve Ruslan Trubaç qabaatlarını tanımağan edi.
2019 senesi oktâbrde "Veciye Kaşka davası"nıñ iştirakçisi Asan Çapuhqa onkologiya hastalığı diagnozı qoyulğanı belli oldı.