"Veciye Kaşka davası"nıñ iştirakçisi Asan Çapuhqa onkologiya hastalığı diagnozı qoyuldı, dep bildirdi Qırım.Aqiqatqa advokat Ayder Azamatov.
Onıñ malümatına köre, Asan Çapuh alâ daa, oña ev tevqifine köre belgilengen kiralı kvartirada yaşay.
"Yazıq ki, amma bulunma adresini deñiştirmek ıntıluvlarımız muvafaqiyetsiz oldı. SİZOda ve ev tevqifinde tutulğance, müşterimniñ sağlığı ğayet pek yaramaylaştı. O bir qaç kere hastahanede yata edi, baqıluvı ve tedaviylevi yapıla edi, o maña haber etkeni kibi, oña rak hastalığı diagnozı qoyuldı. Himiya terapiyasınıñ üç kursu keçti, ögde daa o qadar da olacaq", - aytıp berdi advokat.
Onıñ aytqanına köre, daa evel Asan Çapuh, onıñ ev tevqifi kiralı kvartirada keçkeni sağlığına zarar ketire, dep şikâyet ete edi.
2019 senesi aprel 7-sinde Rusiye nezaretindeki Aqmescitniñ Kiyev rayon mahkemesi, "Veciye Kaşka davası" iştirakçilerine üküm çıqardı. Asan Çapuhqa üç buçuq yıllıq, Bekir Degermenci, Kazim Ametov ve Ruslan Trubaçqa üç yıllıq şartlı cezanı üküm etti.
Üküm apellâtsiyası baqılmağance, iştirakçilerniñ episi ev tevqifi altında bulunacaq.
Aynı vaqıtta, bundan evel Bekir Degermenci, Asan Çapuh, Kazim Ametov ve Ruslan Trubaç qabaatlarını tanımağan edi.
