Rusiye nezaretindeki Qırımnıñ Yuqarı mahkemesi oktâbr 29-ında oturışta "Veciye Kaşka davası" iştirakçileri Asan Çapuhqa, Bekir Degermenci, Kazim Ametov ve Ruslan Trubaçnıñ ükmüne apellâtsiya şikâyetini qanaatlendirmedi, bildire Qırım.Aqiqat mühbiri.
"Bugün "Veciye Kaşka davası" denilgen davağa köre advokatlarnıñ apellâtsiya şikâyetlerini baqtılar. Mahkeme, er şeyni amelde qaldırdı, bu ögünden belli edi. Biz, Kiyev rayon mahkemesiniñ ükmüne apellâtsiya şikâyetini bergenimizden yarım yıl keçti. Bütün bu vaqıt adamlar ev tevqifinde bulundı. Birevni yoqlamaq, bir yerge barmaq imkânları yoq edi. Olarnıñ yaşayışı sıñırlanğan edi", - aytıp berdi advokat Edem Semedlâyev.
2019 senesi aprel 7-sinde Rusiye nezaretindeki Aqmescitniñ Kiyev rayon mahkemesi, "Veciye Kaşka davası" iştirakçilerine üküm çıqardı. Asan Çapuhqa üç buçuq yıllıq, Bekir Degermenci, Kazim Ametov ve Ruslan Trubaçqa üç yıllıq şartlı cezanı üküm etti. Üküm apellâtsiyası baqılmağance, iştirakçilerniñ episi ev tevqifi altında bulunacaq. Aynı vaqıtta, bundan evel Bekir Degermenci, Asan Çapuh, Kazim Ametov ve Ruslan Trubaç qabaatlarını tanımağan edi.
2019 senesi oktâbrde "Veciye Kaşka davası"nıñ iştirakçisi Asan Çapuhqa onkologiya hastalığı diagnozı qoyulğanı belli oldı.
