Ukraina prezidenti Volodımır Zelenskıy ATR qırımtatar telekanalına para berüv meselesini eñ yaqın vaqıtta çezmege söz bere. Bu aqta o, fevralniñ 26-nda Qırımnıñ Rusiye işğaliniñ 6-ncı yılına bağışlanğan Age of Crimea forumında ayttı.
«Qırımnı yayınlarnen temin etmek pek müim, anda insanlarğa zemaneviy Ukraina aqqında tarafsız malümat menbası kerek. ATR telekanalı işine devam etecek, kimse olarnı devlet yardımsız qaldırmaycaq, bu mesele eñ yaqın vaqıtta çezilecek», – dep qayd etti Zelenskıy.
Fevralniñ 10-nda ATR qırımtatar telekanalı esapları blok etildi, dep bildirdi. Şu sebepten telekanal alıp barıcı ve musafirler olmağan yayınlarnen #SaveATR marafonını başlattı.
Fevralniñ 25-nde telekanal Avropa parlamenti ve Avropa komissiyasından maddiy yardım istedi.
Ukraina medeniyet, gençlik ve sport naziri Volodımır Borodânskıy ATR qırımtatar telekanalını qapatuv telükesi bar olğanını inkâr ete. Onıñ aytqanına köre, telekanal çalışa, şu sebepten «qapanmaq üzere olğanını aytmağa kerekmey». Borodânskıynıñ aytqanına köre, 2020 senesi ATR içün 50 mln ğrn belgilendi, nazirlik 8,4 mln ğrn tahsis etti.
ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala.
2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.
