Ukrayina prezidenti Volodımır Zelenskıy qırımtatar halqı genotsidiniñ qurbanlarını añadı. O, sürgünlik biñlernen insan ve bir çoq qoranta içün ölüm fermanı oldı, dep hatırlattı.
Qırımtatar halqınıñ eñ az üçte biri hastalıq, açlıq, işkenceler neticesinde elâk oldı – dep ayttı Ukrayina lideri.
«Cinaiy totalitar sistema ve Moskvada başlarnıñ cezasız qalğanı sebebinden kerçekleşken facia. Bir vaqıt tekrarlanmaması kerek olğan facia. Amma 2014 senesi Qırımnıñ daa bir Rusiye işğali oldı – ve şimdi kene, ne yazıq ki, biñlernen qoranta bölündi. Kene azatlıq ve öz eviñ içün küreşmek kerek», – dep yazdı Zelenskıy.
Kyivde mayısnıñ 18-nde Qırımtatar halqı genotsidiniñ qurbanlarını añma künü munasebetinen hatıra ve destek yeri çalışa. Tedbirler Genotsid qurbanlarınıñ abidesi ögünde saat 14:00-den 20:00-ge qadar keçirilecek.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 200 biñden ziyade kişi sürgün etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
