Ukrayina prezidenti Volodımır Zelenskıy yarın Rusiye ile daa bir esir deñişimi olacaq, dep bildirdi.
"Deñişüv yarın devam etecek. İnsanlarnıñ evlerine qaytması pek güzel. Bu paralel parçalar", — dedi o jurnalistlerge.
Onıñ aytqanına köre, Ukrayina, ABD ve Rusiyeniñ nevbetteki üç taraflı muzakereleriniñ künü başqa künge avuştırıldı, Kıyiv Vashingtondan yañı künni bekley.
"Tarih deñiştirilüvi üç taraflı gruppa çalışmağanı içün degil, Yaqın Şarqta cenk areketleri devam etkeni içündir. Amerika ortaqlarımızdan bir tarih bekleymiz", — dep qoştı Zelenskıy.
Qara qış ve kiçik ayları devamında Ukrayina, ABD ve Rusiye arasında cenkniñ bitirilmesinen bağlı üç taraflı körüşüvler olıp keçti. Olarnıñ neticeleri aqqında bir şey aytılmadı. Amma kiçik aynıñ 5-nde olğan körüşüv neticesinde eyyetler, soñki beş ay içinde ilk arbiy esirlerni deñiştirüv añlaşmasına iriştiler.