Taaciplenüv, istiza, Rusiyeniñ propaganda paradigmasınınıñ muvafaqiyetli olmamasınen bağlı yüzlevler. Ukrainadaki prezident saylavlarını taqip etken çetel talilcileriniñ cevabı bu oldı. «Amerikanıñ sesi» şoumen Volodımır Zelenskıynıñ reylerniñ 70%-ını qazanğanını köstergen Ukraina prezidenti saylavlarınıñ ekinci turındaki exit poll neticeleriniñ birinci izaatlarını topladı.
«Ukraina şimdi kömedemokratiyamı?», – dep yaza Twitterde Bild alman neşiriniñ jurnalisti Julian Röpcke.
Carnegie Endowement tedqiqatçısı Balazs Jarabik şöyle yaza: «Hatırlatuv: Poroşenko beş yıl evelsi daa büyük bir ğalebe qazanğan edi (birinci turda, tarihta ilk sefer). Zelenskıynıñ vazifesi – «qolay» (degil) – Poroşenko olmamaq».
Londondaki Qırallıq kolleciniñ professorı Alexander Clarkson yaza: «Volodımır Zelenskıy etrafında olğan Ukrainanıñ yañı reberligi bir çoq eski sovet memleketlerindeki akimiyet gruppalarından 20-30 yaş genç. Ukraina artıq eski-eski-sovet dünyasında».
Kanadalı jurnalist Michael Colborne Petro Poroşenkonıñ aytqanlarını izaatlap, Twitterde şöyle yaza: «Şimdi yeñilgen biriniñ tweeti degil bu… Altı aydan soñ parlament saylavları olacağını bilgen ve esas rolni oynaycağını tüşüngen birisiniñ tweetidir. Baqarmız».
«İsrailden ğayrı, prezidenti ve baş naziri yeudiy olğan ilk memleket Ukraina olacaqtır. Men ise «faşist huntası» olğanını tüşüngen edim», – dep istiza ete Politico közeticisi David Patrikarakos.
Financial Times mühbiri Max Seddon da Rusiye propagandasınıñ manasız olğanını ayta: «Rusiye kelecek beş yılğa bu memleket natsistlernen tolu propagandasını yañıdan baqmalı, belki!».
Zelenskıynıñ özü ise yaqında bergen intervyüda yeudiy olğanını bir çoq «eksikligi» arasında yigirminci yerge qoya, dep bildirdi (dep yaza «Novoye vremâ»).
Crisis Group ükümetten tış teşkilâtınıñ Ukraina eksperti Katarin Kuinn-Cac Zelenskıynıñ qabul etilüvinde qorantasınıñ tarihiy mirasına esaslanmamalı, dep tenbiley.
O, 2008 senesi ABD tarihında ilk sefer qara tenli prezident Barack Obama saylanğan olsa da, şimdi eali qısmınıñ milletçi ve atta rasist baqışları bazıları tarafından Amerikanıñ problemlerinden biri dep adlandırıla, dep qayd ete.
«Amerika Obamanı saylağanda tarihiy rasizmden nasıl qurtulğanını hatırlaysıñızmı?», – dep yaza ekspert Twitterde.
«Netflixte bir kereden bir serial mevsimini baqmağa utanmaysıñ, çünki iş içün kerek», – dep şaqalaşa «Sluga naroda» («Halqnıñ hızmetçisi» – QA) serialı aqqında Associated Press Moskva jurnalisti Natalya Vasilyeva.
Amerikanıñ sesi, «Amerikanıñ sesinden» alınıp derc etildi
