Ukraina prezidenti Volodımır Zelenskıy ve AQŞ prezidenti Donald Trumpnıñ muzakereleri qırımlılarğa pek meraqlı degil. Bunı, sentâbr 26-sında Qırım.Aqiqat Radiosınıñ efirinde Qırım siyasetşınası Dmıtro Omelçük ayttı.
Oña köre, ilhaq etilgen Qırımda ve qomşu Rusiyede tış siyasetke meraq eksilip tura.
"Qırımda cemiyetniñ ekseriyetine bu mevzular meraqlı degil. Bu, nasıldır kenarda, uzaqta, biz aqqında degil. Şaşılacaq şeyler ola, ebet – tış siyasetke meraq aslı eksile. Bundan da ğayrı, Qırımda daa evelden aşılanıp turğan Amerikağa qarşı keyfler, küçlüdir, ve, belki de, daa küçleşe. Adiy bir adamdan problema nede olğanını sorasañız: er şeyde Amerika qabaatlı. Oldı. Suçlu tapıldı", - dedi ekspert.
Ukraina prezidenti Volodımır Zelenskıy, sentâbr 23-ünde Birleşken Milletler Teşkilâtınıñ Baş Assambleyasınıñ 74-ünci sessiyasında iştirak etmek içün AQŞ-na ketti. New Yorkta olıp o, bir sıra dünya liderlerinen körüşüvlerni keçirdi.
Trump ile körüşüvde Zelenskıy, ilk-evelâ, onıñ maqsadı - Qırım ve Donbassnı qaytarmağa olğanını qayd etti.
Donald Trumptan ğayrı, Zelenskıy, Almaniya kantsleri Angela Merkel, NATO baş kâtibi Jens Stoltenberg, İtaliya baş naziri Giuseppe Conte, Qazahistan prezidenti Qasım Jomart Toqayevnen körüşti.
Ameldeki AQŞ prezindentiniñ (bu George Bush edi) Ukraina ziyareti 2008 senesi edi.
