Keçende Ukraina prezidenti Volodmır Zelenskıy Poloniya devlet başı Andrzej Duda, Estoniya devlet başı Kersti Kalyüayld, Litvaniya devlet başı Gitanas Nauseda ve Letoniya devlet başı Egils Levits ile munaqaşa vaqtında, Rusiye tarafından Qırımnıñ işğal etilmesi ve Donbastaki arbiy çatışma – «bu Avropadaki de cenktir», dep bildirdi.
Zelenskıynıñ muvafıq bildirüvi Ukraina prezidenti ösisiniñ saytında yayınlanğan.
«Bugünde, Ukraina toprağınıñ bir qısmı, bizim Qırım yarımadamız işğal etilgende ve şarqata cenk devam etkende bu pek müimdir. Bu Avropadaki de cenktir, şunıñ içün birlikte olmamız pek mümidir», – dep qayd etti Zelenskıy.
Poloniya prezidenti, Ukraina topraqlarınıñ işğal faktını qabul etmek mümkün degil, dep qayd etti. O, Poloniya Seymindeki çıqışı vaqtında Ukraina topraqlarınıñ işğalini iç bir vaqıt tanımaycağını aytqan Litvaniya prezidenti Gitanas Nausedanıñ mevamını Poloniya alğışlağanını bildirdi. Litvaniya devlet başı, Avropa Birligi azası kibi Ukrainanıñ keolecegine inanğanını ayttı.
Ukraina prezidenti Volodımır Zelenskıy Poloniya zenaatdaşı Andrzej Duda 2021 senesi avgust ayında «Qırım platforması» sammitine kelmege razı oldı, dep bildirdi.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
