Link açıqlığı

Saatnıñ esas haberi

Zelenskıy: «Qırımtatarlarnıñ vatanını sürgünlikten qurtarırmız, dep işanam»


Volodımır Zelenskıy
Volodımır Zelenskıy

Ukraina prezidenti olaraq saylanğan Volodımır Zelenskıynıñ qırımtatar sürgünligi qurbanlarınıñ hatıra kününde bildirgenine köre, o, Ukraina, qırımtatarlarnıñ vatanını işğalden qurtaracaq, dep işana. Bu aqta Zelenskıynıñ matbuat hızmeti Facebookta haber ete.

«Bugün qırımtatar sürgünliginiñ 75 yılı. Bu kün insanlarnı yoq etmek mümkün olsa da, bütün halqnıñ ruhını yoq etmek mümkün olmağanını hatırlata. Qırımtatarlar tarihiy vatanlarına qayttı. Olar bugün de kene repressiyalarnıñ qurbanları oldı – Qırımda Ukrainağa sadıq qalğan insanlar kibi. Er kün yardım, küç, fikirlerimiz olarnen beraberdir. Qırımtatarlarnıñ vatanını işğalden qurtarırmız, dep işanam. Qırımnı qaytaruv yolu ne qadar uzun olsa da, bizler onı qırımlılarnen beraber keçermiz. Bunı beraber yaparmız. Eñ qaranlıq geceniñ bile tañnen bitkenini unutmañız!», – dep aytıla haberde.

Daa evel Ukraina prezidenti Petro Poroşenko Qırımtatar sürgünligi qurbanlarını añma kününde, mayısnıñ 18-nde, «qırımtatar halqınıñ acısı – bizim umumiy acımızdır», dep bildirdi.

Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.

Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.

Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.

XS
SM
MD
LG