Ukraina prezidenti Volodımır Zelenskıy, er yıl fevralniñ 26-nda qayd etilecek Qırım Muhtar Cumhuriyeti ve Aqyar şeeriniñ işğalge qarşı tirenüv künü ilân etilgenine dair buyruqnı imzaladı.
Vesiqa Prezident ofisiniñ saytında derc etildi.
«2014 senesi fevralniñ 26-nda Aqmescit şeerinde qırımtatarlar, ukrainler ve diger millet vekilleri iştirak etken Ukraina topraq bütünligine qoltutuv mitinginiñ yılı munasebetinen vaqtınca işğal etilgen topraqta – Qırım Muhtar Cumhuriyetinde ve Aqyar şeerinde yaşağan Ukraina vatandaşlarınıñ Ukraina topraq bütünligini qorçalağanda köstergen cesaretleri ve qaramanlıqlarına şeref bermek maqsadınen», – dep aytıla buyruqta.
Buyruq derc etilgen künü işke tüşürile, dep haber etile.
Zelenskıy, Kyivdeki Age of Crimea forumında çıqışta bulunıp, Qırımnıñ Rusiye işğaline qarşı tirenüv künü Ukrainada fevralniñ 26-nda devlet seviyesinde qayd etilecek, dep bildirdi. O, Qırım meselesi kün tertibinden çıqarılmay ve «Donbastaki barışıqnıñ fiyatı» olmaycaq, dep ayttı.
Rusiye prezidentiniñ matbuat kâtibi Dmitriy Peskov Ukraina prezidenti Volodımır Zelenskıynıñ fevralniñ 26-nı Qırımnıñ Rusiye işğaline qarşı tirenüv künü olaraq ilân etmek planlarını tenqit etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
