Qırımnıñ Rusiye işğaline qarşı tirenüv künü er yıl fevralniñ 26-nda Ukrainada devlet seviyesinde qayd etilecek. Bu aqta Ukraina prezidenti Volodımır Zelenskıy Kyivdeki Age of Crimea forumında ilân etti.
«Altı yıl evelsi şu künü Aqmescitte devletimizniñ bütünligi ve birligine eñ büyük qoltutuv tedbiri olıp keçti. Miting iştirakçileriniñ cesareti ve qaramanlığını qayd etip, bugün «Qırım Muhtar Cumhuriyeti ve Aqyar şeeriniñ işğaline qarşı tirenüv künü» buyruğını imzalaycam. Bu kün er yıl fevralniñ 26-nda qayd etilecek», – dedi Zelenskıy.
Onıñ bildirgenine köre, Qırım meselesi kün tertibinden çıqarılmay ve «Donbastaki barışıq fiyatı» olamaz.
Age of Crimea forumı çerçivesinde Qırımda insan aqları bozuvları ve tamır halqınıñ aqlarına riayet etüv, yarımadadaki Rusiye propagandası, em de Qara deñiz regionınıñ telükesizlik meselelerini muzakere etmege planlaştırıla.
Fevralniñ 26-nda cemaatçılıqnıñ teşebbüsi ile «Qırımnıñ Rusiye işğaline qarşı tirenüv künü» qayd etile. Şu künü Ukrainada ve dünyada qırımlılarğa ve memleketniñ topraq bütünligine qoltutuv aktsiyaları, munaqaşa, forum, miting ve yürüşler keçirile.
2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2020 senesi yanvar ayında Ukraina Yuqarı Radasınıñ deputatları, olarnıñ arasında Ahtem Çiygoz ve Rustem Umerov, Ukraina prezidenti Volodımır Zelenskıyge muracaat etip, Qırımnıñ Rusiye işğaline qarşı tirenüv kününi devlet seviyesinde resmiy şekilde belgilemesini rica etti.
