Ukraina prezidenti Volodımır Zelenskıy, Rusiye tarafından ilhaq etilgen Qırımdan olğan gençlernen alâqa qurulmasında bütün manialarnı aradan yoq etmesini ve olar içün Ukraina aliy oquv yurtlarına kirişni oldukça qolaylaştırmasını kerekli saya.
Bunı Ukraina prezidentiniñ QMC-nde vekillikniñ matbuat hızmeti bildire.
"Devlet başçısı artıq işğal olunğan topraqlardan olğan gençlerniñ tarafndan Ukraina vatandaşlığınıñ saqlanmasına yardım etecek bir devlet programmasını azırlamağa buyurdı", - dedi Ukraina prezidentiniñ Qırım Muhtar Cumhuriyetindeki daimiy vekili Anton Korınevıç.
Daa evel Ukraina Tasil ve ilim naziri Ğanna Novosad, Qırım ve Donbass abituriyentlerine Ukrainanıñ tek ayrı-ayrı universitetlerine degil de, bütün oquv yurtlarına kirmege ruhset bermek kerek, dep ayta edi.
Soñki eki yıl devamında qırımlılarğa esas Ukrainadaki aliy oquv yurtlarına oqumağa kirmege yardım etken «Qırım – Ukrainadır» tasil merkezleriniñ sayısı üç qat arttı, şimdi 35 danesi bar.
Nazirlikniñ malümatına köre, «Qırım – Ukrainadır» tasil merkezleriniñ vastasınen oqumağa kirgenlerniñ sayısı: 2016 senesi 153 qırımlı, 2017 senesi 204 qırımlı, 2018 senesi 227 insan, 2019 yılda 265 talebe oldı.
Daa evel Ukraina tasil ve İlim nazirligi Qırım ve Donbass abituriyentleri içün talimat derc etken edi.
