Ukraina Tasil ve ilim naziri Ğanna Novosad, Qırım ve Donbass abituriyentlerine Ukrainanıñ tek ayrı-ayrı universitetlerine degil de, bütün oquv yurtlarına kirmege ruhset bermek kerek, dep saya.
"Beş yıldan berli biz, işğal etilgen Donbass ve Qırım abituriyentlerine aliy oquv yurtlarınıñ sıñırlı bir cedveline kiriş imkânını beremiz. Men bellesem, beş yılda bu saylav özüni tüketti, biz bu abituriyetlerge başqace yanaşmalımız", - dedi Novosad Mariuplde Birlik Forumında.
Hususan, nazir, bu abituriyetlerge tek devlet belgilegen universitetler cedveline degil kirmek aqqını bermek kerek, dep saya.
Amma aynı zamanda o, Ukraina nezaret etmegen topraqlardaki abituriyentlerniñ aliy oquv yurtlarına kirmesine azırlav müim bir mesele olıp qala, dep qayd etti.
Soñki eki yıl devamında qırımlılarğa esas Ukrainadaki aliy oquv yurtlarına oqumağa kirmege yardım etken «Qırım – Ukrainadır» tasil merkezleriniñ sayısı üç qat arttı, şimdi 35 danesi bar.
Nazirlikniñ malümatına köre, «Qırım – Ukrainadır» tasil merkezleriniñ 3 yıllıq işinde bu merkezler vastasınen oqumağa kirgenlerniñ sayısı eki qat arttı: 2016 senesi 153 qırımlı, 2017 senesi 204 qırımlı, 2018 senesi ise 227 insan oldı.
Daa evel Ukraina tasil ve İlim nazirligi Qırım ve Donbass abituriyentleri içün talimat derc etken edi.
