Ukraina prezidenti Volodımır Zelenskıy, devlet ilhaq etilgen Qırımda ve muvaqqat işğal etilgen Donetsk ve Lugansk bölgelerinde yaşağan insanlar içün küreşkenini bildirdi. Ukraina Mustaqilligi künü munasebeti ile çıqışı vaqtında о, «insanlarnıñ Ukrainağa sevgisini işğal etmek mümkün degil», dep ayttı.
«Andaki adamlar içün küreşemiz, çünki topraqnı muvaqqat işğal etmek mümkün, amma adamlarnıñ Ukrainağa olğan sevgisini işğal etmek mümkün degil. İnsanlarnı şaşırtıp pasport aldırtmaq mümkün, amma olarnıñ ukrain yüreklerini pasportlaştırmaq mümkün», – degil dedi o.
Onıñ sözlerine köre, işğal etilgen topraqlarda yaşağan insanlar bunı açıq bildirmekten qorqa bileler, amma «bu bunıñ aqqında tüşünmekten qorqqanları añlamına kelmey».
«Ukrainanıñ büyük bir memleket olğanı zaman soñki sefer olması içün pek çoq şeyni ilk sefer yapamız. Qırım ve Dlnbasnıñ işğal etilmegen devirler de soñ olmaycaq. Ve küçlü memleket bir kimse onıñ meselelerini al etecegini beklemey», – dep qayd etti devlet başı.
Avgustnıñ 24-nde Ukraina Mustaqilliginiñ 30-ncı yıldönümini qayd ete.
Kyivde avgustnıñ 23-nde «Qırım platformasınıñ» birinci sammitinde iştirak etken 43 memleket ve halqara teşkilât Ukraina topraq bütünligini halqara seviyede tanılğan sıñırlarda ğayrıdan tiklemege çağırğan ortaq Beyannameni imzaladı.
Ukraina Tış işler naziri Dmıtro Kuleba sammitte qabul etilecek beyannamağa temsilcileri Kyivge kelmegen devletler qoşula bile, dep bildirgen edi.
Rusiye sammit keçirilüvine qarşı naralızıq bildirgen edi. Moskva tedbirni «şabaş» dep adlandırdı ve iştirakçilerini aqibetler bekley, dep qorquza. Forum başlamazdan evel Rusiye akimiyeti Ukraina Tış işler naziri Dmıtro Kuleba ve Milliy telükesizlik ve mudafaa şurasınıñ kâtibi Oleksiy Danilovğa qarşı şahsiy sanktsiyalar kirsetti.
Rusiye kontrolindeki «Qırım platformasını» ve avgustnıñ 23-nde Kyivde olıp keçken sammitini «Ukraina sakinlerine Qırımnı işğalden qurtaruv faaliyetini köstermek» içün «informatsion fon» dep adlandırdı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
