Ukraina prezidenti Volodımır Zelenskıy, Qıtaydaki koronavirus problemini Sağlıq nazirliginiñ reberliginen muzakere etti, dep haber ete Azatlıq Radiosı.
Sağlıq naziri Zorâna Skaletska qayd etkenine köre, al-azırda Ukrainada yañı virus hastaları qayd etilmedi. Bugün kütleviy haber vastaları bildirgen hastalarda, onıñ aytqanına köre, adiy gripp çıqtı.
«Bugün (koronavirus – QA) tapılsa, er kes ne yapacağını bile, tedaviylev ve tedqiq yapılmalı. Laboratoriyalar ve test sistemaları koronavirus şübhelilerini tapıp red etmege azır. Global, devletlerara seviyede vaziyetni kontrol etken halqara teşkilâtlarnen er kün işbirligi tutamız», – dedi Skaletska.
Sağlıq naziriniñ muavini Viktor Lâşkonıñ bildirgenine köre, sıñır hızmetinen daimiy operativ bağ quruldı, ava limanlarında yolcularnı teşkerüv talimatı bar. O, Ukrainada virus tapılsa, onı tedaviylemege azırlar, dep işandırdı.
«Qıtayda insanlarnı tedaviylemege yardım etken tehnologiyalar Ukrainada da qullanıla. İnfektsiya mütehassısı olarnı bile ve olardan faydalanmağa azır. Böyle tehnologiyalar yardımınen olar mantarğa oşağan hastalıqlarnı tedaviyley», – dep qayd etti Lâşko.
Qıtayda yañı koronavirus sebebinden can bergenlerniñ sayısı 41-ge arttı.
Virus çetelde, hususan Singapur ve Vyetnamde tarqala. Yaponiya, Filippinler, Cenübiy Koreya, Tayvan, Tailand, Saudiy Arabistan ve ABDde, em de Qıtaynıñ Gonkong ve Makaosında hastalanğanlar bar.
Qıtay akimiyeti tarqalğan yañı koronavirus sebebinden 41 million insan yaşağan 13 şeerni karantinge qapattı.
Dünya sağlıq teşkilâtı, diger beş memlekette hastalar qayd etilgenine baqmadan, dünyada fevqulâde vaziyetni ilân etmedi. Yanvarniñ 23-nde DST «halqara fevqulâde vaziyetni» ilân etmege acet yoq, dep bildirdi, amma «Qıtay içün bu fevqulâde vaziyet».
2019-nCoV olaraq belli virus koronavirusnıñ yañı çeşiti sayıla, daa evel insanlarda olmağan edi. Yañı virus 2000 yıllarınıñ başında dünyada 800 insannı öldürgen SARS virusına oşağanı içün ğam-qasevet doğurdı.
