Qıtayda yañı koronavirustan elâk olğanlarnıñ sayısı bir künde 26 insandan 41 insanğa qadar arttı. Memleketniñ 29 vilâyetinde 1287 insan hastalandı, 237 hasta ağır alda buluna. Bu aqta Azatlıq Radiosınıñ rus hızmeti bildire.
Elâk olğanlar arasında Hubey şeerinde hastalarnı baqqan ekim bar, andan yañı çeşit pnevmoniya başladı.
Berilgen malümatqa köre, eki hasta Parijde hastahanege alındı, daa bir kişi – Bordoda. Eki hasta aqqında ABDde haber etildi – Seattle ve Chicagoda. Avstraliyanıñ Viktoriya ştatında da bir hasta qayd etildi.
Virus çetelde, hususan Singapur ve Vyetnamde tarqala. Yaponiya, Filippinler, Cenübiy Koreya, Tayvan, Tailand, Saudiy Arabistan ve ABDde, em de Qıtaynıñ Gonkong ve Makaosında hastalanğanlar bar.
Qıtay akimiyeti tarqalğan yañı koronavirus sebebinden 41 million insan yaşağan 13 şeerni karantinge qapattı.
Dünya sağlıq teşkilâtı, diger beş memlekette hastalar qayd etilgenine baqmadan, dünyada fevqulâde vaziyetni ilân etmedi. Yanvarniñ 23-nde DST «halqara fevqulâde vaziyetni» ilân etmege acet yoq, dep bildirdi, amma «Qıtay içün bu fevqulâde vaziyet».
2019-nCoV olaraq belli virus koronavirusnıñ yañı çeşiti sayıla, daa evel insanlarda olmağan edi. Yañı virus 2000 yıllarınıñ başında dünyada 800 insannı öldürgen SARS virusına oşağanı içün ğam-qasevet doğurdı.
