Ukraina prezidenti Volodımır Zelenskıy ukrainalı siyasiy mabüslerni qaytarmaq içün Rusiye prezidenti Vladimir Putinnen laf etmege azır olğanını bildirdi. Bu aqta Zelenskıy oktâbrniñ 10-nda Kyivde matbuat marafonı vaqtında ayttı.
«Esarette, Rusiyede ya da Qırımda, ya da vaqtınca işğal etilgen «DNR», «LNR» topraqlarında apiste yatqan iç kimse kimse iç bir vaqıt unutmaycaq. Şimidik deñişim içün eki cedvelimiz bar. Qırımlılar tek Rusiyenen muzakere etilecek cedvelge kire. Diger cedvel – «DNR», «LNR» topraqlarında bulunğan insanlar, bizim insanlarımız, bu mesele de muzakere etile», – dep qayd etti o.
Zelenskıy, deñişim qararı «norman formatında» alınacaq, dep qoştı.
«Amma qarar «norman formatında» olacaq, mence. «Norman formatı» sozulsa, insanlarımıznı qaytarmaq içün başqa formatlarnı tapacaqmız. Olardan biri – Minsk, işke yarağan digeri ise – Rusiye prezidenti ile keçirilgen doğru muzakerelerim. İnsanlarımıznı qaytarmaq ve deñişim yapmaq içün bu doğru muzakerelerge azırım», – dedi Zelenskıy.
Kreml, Ukraina prezidentiniñ aytqanlarını daa izaatlamadı.
Oktâbrniñ 9-nda Ukraina prezidenti Volodımır Zelenskıy Qırım.Aqiqatqa izaat berip, Ukraina, Rusiye, Frenkistan ve Almaniya liderleri «norman formatında» körüşken soñ Ukraina ve Rusiye arasında yañı mabüs deñişiminiñ künü belli olacağından emin olanını bildirdi.
Oktâbrniñ 1-nde olğan brifingde prezident Volodımır Zelenskıy, Minskteki Üç taraflı bağ gruppasınıñ toplaşuvında ukrainalı mabüslerniñ azat etilüviniñ ekinci basamağı muzakere etildi, dep bildirdi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheliVladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
