Ukraina prezidenti Volodımır Zelenskıy, Ukraina, Rusiye, Frenkistan ve Almaniya liderleri «norman formatında» körüşken soñ Ukraina ve Rusiye arasında yañı mabüs deñişiminiñ künü belli olacağından emin. Bu aqta o, «Silâ ve telükesizlik» sergisini ziyaret etkende Qırım.Aqiqatqa bergen eksklüziv izaatında ayttı.
«Norman formatında» eñ müim mesele – insan deñişimi, anda eki deñişim bar – köterilecek dep añlaşma yapılğan edi: Rusiyede, «DNR» topraqlarında insanlarımız bar. İsteymiz… Anda çoq insan bar», – dedi Zelenskıy.
Yañı deñişim künü «norman formatında» keçirilecek körüşüvden soñ belli olacaqmı sualine Zelenskıy böyle cevap berdi: «Ebet, eminim. Bekleymiz».
Bu aqta tafsilâtlıca Qırım.Aqiqat TV programmasında ve YouTubetaki Azatlıq Radiosında oktâbrniñ 12-nde saat 12:00-da seyir etiñiz.
Oktâbrniñ 1-nde olğan brifingde prezident Volodımır Zelenskıy, Minskteki Üç taraflı bağ gruppasınıñ toplaşuvında ukrainalı mabüslerniñ azat etilüviniñ ekinci basamağı muzakere etildi, dep bildirdi.
Devamlı teneffüsten soñ eñ yaqın vaqıtta Ukraina, Frenkistan, Rusiye ve Almaniya reberleriniñ iştiraki ile «norman formatında» yañı sammit ötkerilmesi mümkün. Buña Ukraina prezidenti Volodımır Zelenskıy çağıra. O, iştirakçilerniñ sayısını arttırıp, Büyük Britaniya ve Amerika Birleşken Devletlerini celp etmege teklif etti, amma bu teklifine şimdilik qoltutmadılar.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheliVladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
