Rusiye kontrolindeki Qırım Yuqarı mahkemesi birinci instantsiya mahkemesiniñ Qırımtatar Milliy Qurultayı Merkeziy saylav komissiyasınıñ yolbaşçısı Zair Smedlâğa 30 biñ ruble memuriy para cezasını berüv qararına qarşı imaye bergen istinaf şikâyetini red etti. Bu aqta «Krımskiy protsess» neşiri bildire.
Smedlâ, «yüksek seviyeli azırlıq rejimi sıñırlavlarını bozğanında» qabaatlandı. O, sentâbrniñ 4-nde FSB binası ögünde tutulğanlardan biri edi.
Qayd etilgenine köre, mahkeme imayecilerniñ ihtarlarına qulaq asmayıp, davadaki şahıslarnıñ aytqanları protsessual bozuvlarnen alındı, dep bildirdi.
Smedlânıñ aytqanına köre, mahkeme şikâyetni beş daqqada baqtı, daa 10 daqqa qarar aldı. O, başqa netice olacağını beklemedi, dep qoştı.
Bugün mahkeme «Avdet» qırımtatar gazetasınıñ muarriri Şevket Kaybullayevni yüksek seviyeli azırlıq rejimini bozğanında qabaatlağan birinci instantsiya mahkemesiniñ qararını deñiştirmedi. Oña 5 biñ ruble para cezası berildi.
Rusiye kontrolindeki Aqmescitniñ Kiyev rayon mahkemesiniñ qadısı Mihail Belousov sentâbrniñ 16-nda Qırımtatar Milliy Qurultayınıñ Merkeziy saylav komissiyasınıñ yolbaşçısı, faal Zair Smedlânı «yüksek seviyeli azırlıq rejiminiñ sıñırlavlarını bozğanında» qabaatlap, oña azamiy ceza berdi – 30 biñ ruble para cezası. Faal sentâbrniñ 4-nde Aqmescitteki Rusiye FSBsiniñ binası ögünde tutulğanlar arasında edi, dep bildire Qırım.Aqiqat mühbiri.
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Aralarında qırımtatar siyasetçisi ve faali Nariman Celâl bar. FSB malümatına köre, qırımtatarlar «bu yıl avgustnıñ 23-nde Qırımdaki gaz borusında diversiya yapqanları şübhesinen tutuldı. Rusiye müessisesi, tutulğanlar qabaatını itiraf etti, dep bildirdi». Bu malümatqa köre, «FSB tarqatqan sorğu videosında eki erkek kimden talimat alğanını ve Anğara köyünde gaz borusını nasıl patlatqanlarını tafsilâtlâca tarif etti».
