Rusiye kontrolindeki Qırım Yuqarı mahkemesi «Avdet» qırımtatar gazetasınıñ muarriri Şevket Kaybullayevni yüksek seviyeli azırlıq rejimini bozğanında qabaatlağan birinci instantsiya mahkemesiniñ qararını deñiştirmedi. Kaybullayev sentâbrniñ 4-nde kütleviy tutuvlar vaqtında Aqmescitteki FSB idaresiniñ binası ögünde maşinada edi. Bu aqta «Krımskiy protsess» neşiri haber ete.
Qayd etilgenine köre, dava eñ çoq on beş daqqa baqıldı.
İmaye, memuriy protokol tizilgende hatalar yapıldı, dep qayd etti. Qadı Vladimir Agin, cemaat imayecisi Hatice Mamutovanıñ aytqanına köre, tarihçı olğan Kaybullayev akimiyet kirsetken sıñırlavlarnıñ rolüni añlamalı, dep ayttı.
Neticede mahkeme mahkeme qararını deñiştirmedi. Kaybullayev 5 biñ ruble memuriy para cezasını tölemeli.
«Avdet» qırımtatar gazetiniñ baş muarriri Şevket Kaybullayevge sentâbrniñ 4-nde Aqmescitte FSB binası ögünde kütleviy tutulmalardan soñ 5 biñ ruble parası cezası berildi.
Muvafıq qararnı sentâbrniñ 17-nde Rusiyeniñ nezaretinde olğan Aqmescitniñ Kiyev rayon mahkemesi çıqardı.
Rusiye kontrolindeki Aqmescitniñ Kiyev rayon mahkemesiniñ qadısı Mihail Belousov sentâbrniñ 16-nda Qırımtatar Milliy Qurultayınıñ Merkeziy saylav komissiyasınıñ yolbaşçısı, faal Zair Smedlânı «yüksek seviyeli azırlıq rejiminiñ sıñırlavlarını bozğanında» qabaatlap, oña azamiy ceza berdi – 30 biñ ruble para cezası. Faal sentâbrniñ 4-nde Aqmescitteki Rusiye FSBsiniñ binası ögünde tutulğanlar arasında edi, dep bildire Qırım.Aqiqat mühbiri.
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
