Bağçasarayda fevralniñ 12-nde Rusiye Federatsiyasınıñ uquq qoruyıcıları qırımtatarı Yunus Suleymanovnıñ evinde tintüv keçirdi, onı tutqanlar, dep bildire "Qırım birdemligi" cemaat areketi. Bugün Qırımda eki tintüv oldı.
"Tintüvden soñ er adam tutuldı ve FSB hadimleri tarafından alıp ketildi. Al-azırda bağ yoq, bulunğan yeri ve statusı resmiy şekilde haber etilmey. Qabaatlavlarnıñ tafsilâtları şimdilik belli degil", – dep aytıla haberde.
Rusiye Federatsiyası uquq qoruyıcılarınıñ vaziyetnen bağlı resmiy izaatları yoq.
Hatırlatasız, bugün Qırımnıñ Bağçasaray rayonınıñ Ulaqlı (Glubokiy Yar) köyünde fevralniñ 12-nde saba erte Rusiye uquq qoruyıcıları 42 yaşında Nariman Seytaliyevniñ evini tintti. Eki yasaqlanğan kitap tapıldı dep, erkekni alıp kettiler. Seytaliyevniñ vesiqaları, cep telefonı ve, qorantanıñ aytqanına köre, hadimleri özü ketirgen eki kitap alındı.
Qırımtatar resurs merkeziniñ 2025 senesi Qırımda insan aqları bozuvlarına dair esabatını derc etip, yıl devamında işğal etilgen yarımadada 244 apiske aluv, 90-ı qırımtatarlarğa qarşı qayd etildi, dep bildirdi. 40 tintüv, 159 tutuv, 159 sorğu, sorav ve "subet" qayd etildi.