Qırımnıñ Bağçasaray rayonınıñ Ulaqlı (Glubokiy Yar) köyünde fevralniñ 12-nde saba erte Rusiye uquq qoruyıcıları 42 yaşında Nariman Seytaliyevniñ evini tintti. Tintüvden soñ erkekni tutıp, evinden alıp kettiler. Bu aqta "Qırım birdemligi" cemaat birleşmesi erkekniñ tuvğanlarınıñ malümatına esaslanıp haber ete.
Ömür arqadaşı Zaremanıñ faallerge bildirgenine köre, tintüv saba dörtte başladı. Narimannıñ qollarını bağlap yerge yatqızğanlar, qollarını arqada tutqanlar. Evge tahminen on kişi kirdi.
"Uquq qoruyıcılar evniñ er tarafına baqtı. Bütün kâğıt ve fayllarnı baqtı, vesiqalarnı inceledi. Olar bala şeylerini de baqqanlar. Soñ olaraq yataq odasını teşkergenler. Tintüv bitkenine köre bir şey tapılmadı, amma soñra hadimleyer yasaqlanğan kitaplar bar, dep ayttı", – dep yaza "Qırım birdemligi".
Tutulğannıñ apayı aytqanına köre, advokatnen bağlanmağa imkân berilmedi, tintüv bitken soñ telefon etmege mümkün, dep aytıldı.
Seytaliyevniñ vesiqaları, cep telefonı ve, qorantanıñ aytqanına köre, hadimleri özü ketirgen eki kitap alındı.
"Balalarnı pek qorquzğanlar. Balalar ne olğanını daa añlamadılar, amma büyük stress yaşadılar. Soñunda vedalaşmaq ve şeylerini toplamaq içün 15 daqqa bergenler", – dep tarif etti Narimannıñ apayı.
Rusiye uquq qoruyıcıları vaziyetni resmiy şekilde daa izaatlamadı.
Qırımtatar resurs merkeziniñ 2025 senesi Qırımda insan aqları bozuvlarına dair esabatını derc etip, yıl devamında işğal etilgen yarımadada 244 apiske aluv, 90-ı qırımtatarlarğa qarşı qayd etildi, dep bildirdi. 40 tintüv, 159 tutuv, 159 sorğu, sorav ve "subet" qayd etildi.