"Yaşay ve memleketimni seve edim": cebede Qırımlı, sabıq siyasiy mabüs Gennadiy Afanasyev elâk oldı

Qırımlı Gennadiy Afanasyevniñ aqrabaları ve safdaşları onıñ cebede ölgenini bildirdi. Rusiyeniñ Ukrayinağa qarşı büyük istilâsı başlanğandan berli Kremlniñ sabıq siyasiy mabüsi başta Kıyivniñ territorial mudafaasına ketti, soñra ise Rusiye ordusınıñ ücümlerinden Ukrayinanıñ diger bölgelerini imaye etti. Qırım.Aqiqat qırımlınıñ 2014 senesi yarımadanıñ Rusiye tarafından işğaline qarşı muqavemet köstermekten ve apiste Rusiye sistemasına qarşı küreşinden başlap, Rusiyeniñ Ukrayinağa qarşı büyük istilâsına qarşı tirenüvine qadar ikâyesini aytıp bere.

Gennadiy Afanasyev Rusiyeniñ büyük istilâsınıñ ilk künlerinden elinde silânen Ukrayinanı imaye etti. İçtimaiy ağlardaki yazıların köre, o, cenkniñ birinci künü arbiy komissarlıqqa ketti ve on ay qadar cebede oldı.

"Tuvğan Qırımı kene Ukrayina nezareti altına qaytacağına inana edi"

Qırım "Tor" şartlı ismi ile 241-inci brigadanıñ territorial mudafaasınıñ 130-ıncı batalyonında cenkleşti.

Dekabrniñ 21-nde qırımlı, vatandaş faali, сабыкъ siyasiy mabüs Gennadiy Afanasyevniñ cebede elâk olğanı aqqında haberler peyda oldı. Afanasyevniñ Ukrayınanı qorup elâk olğanını ömür arqadaşı Lüdmila Afanasyeva Qırım.Aqiqatqa tasdıqladı.

Qırımlınıñ anası Olga Afanasyeva içtimaiy ağlarda oğlunıñ ölümi ile bağlı haber alğanını bildirdi.

Qırımtatar Milliy Meclisiniñ reis muavini, Ukrayına halq deputatı Ahtem Çiygoznıñ Qırım.Aqiqatqa bildirgenine köre, Afanasyev Lugansk vilâyetinde Biloğorivka civarında elâk olğan.

"Memleketini qorup cebede sabıq siyasiy mabüs Gennadiy Afanasyev elâk oldı. Qaramanrğa şan-şerefler olsun!", - dep yazdı içtimaiy ağlarda USQ arbiyi, Kremlniñ sabıq siyasiy mabüsi Oleg Sentsov.

Qırımlınıñ ölümi aqqında 5-nci Ukrayına przedenti Petro Poroşenko da bildirdi.

"Ğayıp etmek qıyındır. Kimniñ oğrunda küreşkeniñiz ve Ukrayina oğrunda birlikte küreşkeniñiz kişilerni ğayıp etmek hususan qıyındır. Genadiyniñ Taqdiri qyın edi - apis, esirlik, iskenceler başından keçirdi. Ve yıqılmadı, eñ çoq tuvğan Qırımı kene Ukrayina nezareti altına qaytacağına inandı. Halqara meydançıqlarda bunıñ oğrunda küreşti. Rusiyelilerniñ quturğan lideri büyük istilâğa başlağanda eline silâ aldı. Kelişken sözlerni tapmaq qıyın. Ailesine sabırlar tileyim", - dep yazdı o.

Qırım, iskenceler, Rusiye apishanesi

Aqmescitli fotoressam ve uquqçı Gennadiy Afanasyevniñ adı «qırımlı terroristler» davasınıñ mabüsi olğan soñ meşur oldı. 2014 senesi o, Qırımnıñ Rusiye işğaline qarşı çıqtı, soñra Aqmescitte FSB hadimleri tarafından tutuldı. Onı terakt azırlağanında qabaatladılar. Halqara aq qorçalayıcı teşkilâtlar davanı siyasiy, mabüslerini ise siyasiy mabüs dep adlandırğan edi.

Onen beraber o zaman bu davanıñ diger figuratları Oleg Sentsov, Oleksandr Kolçenko ve Oleksiy Çirniy yaqalandı.

Uquq qoruyıcılar bu davada mabüslerniñ suçlu olğanına dair isbatlar yoqtır, olarnıñ tutulğan ve mahkeme etilgen şarait ise bu davanıñ siyasiy motivli olğanını köstere, dep sayalar.

Gennadiy Afanasyev, şaatlığı FSB zindanlarında iskence altında zorla alınğanını açıq şekilde bildirip, onı keri alğan ilk kişi oldı. Onıñ şaatlığı sayesinde, Rusiye quvetçileriniñ qırımlılarnı çekiştirgeniniñ tafsilâtı belli oldı - elektrik aqımı ile iskenceler, köteklev, maneviy basqılar ve ilâhre.

Advokatlarnıñ ve uquq qoruyıcılarnıñ Gennadiy Afanasyevniñ siyasiy taqibi ile bağlı bildirmelerine baqmadan, Rusiye mahkemesi onı 10 yıl apis cezasına mahküm etti. O bir qaç yıl apishanede yattı ve 2019 senesi Ukrayina ve Rusiye arasında mabüs deñişüvi neticesinde azat etildi.

Azat etilüvden soñ yaşayış

Bundan soñ Gennadiy Afanasyev tuvğan Qırımğa qaytıp olamadı ve Kıyivde yaşamağa qaldı. Faal ve Ukrayina TİN mahsus temsilcisi olaraq Rusiye ve Qırımda tutulğan ukrayin siyasiy mabüslerniñ azat etilmesi oğrunda küreşti.

2016-2018 seneleri Afanasyev Qırım.Aqiqatnıñ müellifi edi - o, rusiye apishanesi ile bağlı hatırlavlarını aks ettirgen öz metinlerini derc etti. yeticede "Yıqıluvdan soñ köterilmek" adlı kitap meydanğa keldi.

"Men hatıralarnı yazmadım, memleketinde yaşağan, vatanını sevgen bir insannıñ yaşayış ikâyesini yazmağa tırıştım. Bu vatanperverlik cıltı, amma o müim bir rol oynamay. Anda söz adamnıñ yıqıla, keri çeki, hata yapa bilmesi, amma keçmişke baqmadan, yaşayışını devam ete bilmesi aqqındadır", - degen edi o zaman Gennadiy Afanasyev.

Rusiye apsinden azat etilgen soñ qırımlı onıñ şaatlığı esasında da apis cezasına mahküm etilgen Oleg Sentsov ögünde kendini qabaatlı sayğanını gizlemey edi.

Oleg Sentsov özü, oña ve qırımlı anarhist Oleksandr Kolçenkoğa qarşı şaatlıq etken Gennadiy Afanasyev ve Oleksiy Çirniyge darğın olmağanını bildirgen edi.

Rusiyeniñ Ukrayinağa qarşı büyük istilâsından evel Afanasyev evlendi ve onıñ qızı doğdı.

Cenk

Fevralniñ 27-nde Gennadiy Afanasyev Kıyivde gece nevbetçiliginden bir fotoresim yayınladı.

"Kıyivniñ territorial mudafaası, yüzlernen qız ve oğlan, genç ve esli, sağ ve hasta - epimiz soñuna qadar ketmege azırmız. Bazıları silânen, bazıla molotov kökteylerinen. Biz olarnı (rusiye ordusını - QA) episini yoq etermiz ya da mümkün qadar çoqusınıñ canını alırmız", - dep yazğan edi o rusiye ordusınıñ Kıyivge ücüm etken künleri.

Gennadiy Afanasyev Ukrayina Silâlı Quvetleriniñ sıralarında cenkleşmek qararını memleketini ve tuvğan Qırımını azat körmek istegi ile añlattı.

"Qısqadan, Ukrayinanı imaye etmek içün qoşuldım (Ukrayina Silâlı quvetlerine - QA). Ukrayinlerge ve qırımlılarğa tek bir şeyni añlatmaq isteyim: tezden Qırım Ukrayina nezareti altına qaytacaq. Ukrayina işğalcilerden ve basqıncılardan azat olacaq. Biz olarnı episini öldürirmiz ve yeñermiz", - degen edi o Qırım.Aqiqatqa mart ayında.

Kıyiv vilâyetiniñ Ukrayina Silâlı Quvetleri tarafından Rusi ordusından azat etilgen soñ, Gennadiy USQ hızmetini devam ettirdi. Rusiyeniñ Ukrayinağa qarşı büyük istilâsınıñ on ayı içinde o Harkivy ve Donetsk vilâyetlerinde oldı. Oıñ arbiy yolu Lugansk vilâyetinde soñuna keldi.

Gennadiy Afanasyevniñ anası, apayı ve eki yaşındaki qızı qaldı. Zamandaşları ve kelecek nesiller içün ondan ukrayin kitap tükânlarınıñ raflarında tapa bilecegiñiz kitap qaldı.

MALÜMAT: Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.