Rusiyede reis qadı Aleksey Magomadov sıfatında Cenübiy okrugınıñ arbiy mahkemesi aşçı Yaşar Şihametovnı terrorizmde qabaatlap, 11 yılğa azatlıqtan marum etti. Bu aqta «Qırım birdemligi» cemaat birleşmesi haber ete.
Tutulmazdan evel qabaatlanğan kişi Qırımda qavede çalışqan edi.
Qadı Aleksey Magomadov Rusiye Federatsiyasınıñ Ceza kodeksiniñ 205.5 maddesiniñ 2-nci qısmına istinaden üküm çıqardı. Şihametov 11 yılğa sert rejimli koloniyada qalmasına üküm etildi, ilk 4 yılını daa sert şaraitli apishanede keçirecek.
Prokuror Sergey Aydinov Yaşar Şihametovnı 11 yılğa üküm etmege talap etken edi. Qabaatlayıcı kiçik balası olğanı içün «kereginden az» apis cezası oldı, dep qayd etti.
Şihametovnıñ sağlıq problemleri bar: yürek, aşqazan, sırt ve qaraciger problemleri bar. Sağlığı yaramay olğanı içün mahkeme oturışuvları sıq-sıq başqa künge qaldırılğan edi, soñki oturışuvda ise üküm çıqarılmazdan evel mabüske acele yardım çağırıldı.
Zayıf sağlığına baqmadan, mahkeme Şihametovnıñ apiste qaluv müddetini uzata edi. Çaresi qalmağan qabaatlanğan kişi «akvarium» divarlarına urıp, qadı ve prokurorlarnen «laf etmege istemey» dep qıçırğan soñ mahkemeden çıqarıldı. Hastalıqlardan sebep Şihametov munaqaşada öyle de söz alamadı, mahkeme mabüs şaatlıq etmekten vazgeçti, dep qarar aldı.
«Endi yaşayım dep aytmaq zor, az olsa da, küçüm yetkeni qadar balalarıma terbiye bermege isteyim. Zornen yürem. Meni terrorist kibi reine tutalar, amma terrorist degilim. Hastalıqlarnıñ eñ güzel devası bu cinaiy davanı lâğu etmek olacaq», — dep ayttı Şihametov prokurorğa.
«Qırım birdemligi» qayd etkenine köre, Şihametovğa qarşı davanıñ bütün qabaatlavları «Hizb ut-Tahrir» esnaslarınen aynı. Tutmaq ve apiske almaq içün evinde tapılğan ve parmaq izi olmağan yasaqlanğan bir edebiyat oldı. Qabaatınıñ delilleri dava uydurğan FSB hadimleriniñ ve aytqanları mahkede isbatlanamağan gizli şaatlarnıñ şaatlığı ola. Daa bir müim faktor yıllar devamında «Hizb ut-Tahrir» davaları boyunca FSB ile işbirligi yapqan Qazandaki Regionlarar ekspertiza ve qıymet kesüv merkeziniñ tahqiqat ekspertizası ola.
FSB hadimleri sorğularda qavede çalışqan Şihametov yasaqlanğan toplaşuvlarda iştirak etip ve yañı tarafdarlarnı celp etip, aslında «mefküreviy iş» yaptı, dep ayttı. Meselâ, operativci Fedor Fond mabüs «mefküreviy propagandanı fısıldap yaptı», dep bildirdi, şunıñ içün ses qaydını yapmaq zor olğan eken. Qavege işanmağan insanlar kelgende ise subet mevzusı birden deñişken eken.
Şihametov mahkemede ses qaydlarındaki sesniñ oña ait olğanını inkâr etmedi, amma subet yañlış yetkizildi, dep ayttı. «Yalan! Yapıştırğanlar! Bir şey aytam, anda başqa söz ola, başqa cevap. Oquğanda özüñiz de añlağansıñız», — dep qayd etti mabüs mahkemede. İmayeci subetlerni «qavede çaynen subet» olaraq tasnif etti.
Gizli şaatlar FSB bölüginde ilk tahqiqatta bergen şaatlıqlarnı tekrarladı, amma mahkemede olarnı tam aytmadılar. İmayeci Aleksey Ladin şaat «Aliyevniñ» şaatlığı protokolda mahkemede aytqanlarından daa keniş edi, dep qayd etti.
2021 senesi fevral ayında Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov Qırımdaki Rusiye FSB idaresine ketirildi. FSB tahqiqatçılarınıñ tuvğanlarına bildirgenine köre, tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan ve Ukraina ve bir çoq memlekette milliy qanun seviyesinde sıñırsız çalışqan «Hizb ut-Tahrir» diniy teşkilâtınıñ faaliyetinen alâqası bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
